CAB hi BJP-te'n Hindu ram an siam tumna hmanrua a ni- Lal Thanhawla

Mizoram Pradesh Congress Committee (MPCC) president Lal Thanhawla chuan, Citizenship Amendment Bill (CAB) chu BJP-te'n India ram Hindu rama an siam tumna hmanrua a nih thu a sawi.

Lal Thanhawla'n tun hnaia Serampore College (University) aṭanga Doctor of Divinity a dawn MPCC-te'n Congress Bhavan-a an lawmsaknaah thu sawiin MPCC President chuan, Mizote tan CAB chu do loh rual a nih loh thu a sawi a, "BJP-te hian India ram hi Hindu rama siam an tum. CAB hmang hian min chimral an tum a, Amit Shah hian min thawi dam a tumna hi a tih tak tak ka 

ring lo," a ti.

Lal Thanhawla chuan BJP-te'n CAB bakah Uniform Civil Code kalpui an tum thu sawiin, "Hriatthiam theih danah chuan, Hindu Civil Code a ni mai. Hindu ram siam an tum avangin CAB aṭangin hma an la ṭan a, an thil tum hi an MP màwl ve deuh deuhte'n an sawi chhuak ṭhin. Kan invènna atana ṭha ber chu ṭawngṭaina a ni," a ti a; BJP-te chu ṭawngṭaina avangin an tlakhniam ve zel thu a sawi.

Mizoramin kum 20 chhung ṭah leh ha ṭhialna a tawrh thu sawiin Hawla chuan, "Mipuite'n an tlin tawh lo a, Congress chuan a sorkar hnuah a intiam ang ngeiin lalṭhutthleng kianin, remna leh muanna a awm phah a ni. Tun thlengin remna leh muanna a awm. Remna mai bakah kan hun lai chuan GSDP a sang ber pathumnate kan ni chho zak zak a ni," a ti.

MPCC President chuan, an party programme reng reng chu miretheite lam ṭang leh hmasawnna lam hawi a nih zel thu sawiin, "Lal Isua telna tlak a ni em tih kan ngaihtuah tel ṭhin. NLUP pawh hék mah se, Prime Minister-in 

ṭha a ti zawk a ni. NLUP vangin boruak fím tak kan neih chhoh zel theih phah," a ti a, an programme-te chu a hlawhtlin zel thu a sawi.

Doctor of Divinity a dawn chungchangah Lal Thanhawla chuan, "A tling lo berin ka dawng hi Lalpa'n thil ropui min tihsak vang a ni. Congress party-a rinawm taka awmte avangin hetiang dinhmun hi ka chang thei a ni," a ti.