Private hospital-te'n mipui hriatthiamna ngen
Non Government Hospital Association of Mizoram (NGHAM) chuan thuchhuah siamin, medical reimbursement tih theih loh tura Mizoram sorkarin a pawmpuina (empanelment) a hlih (suspend) chhan - sorkarin private hospital-te hman tur rate a siam chu private hospital-te tan pawm theih chi a nih loh thu an tarlang a, mipui hriatthiamna an ngen.
NGHAM chuan, Mizorama sorkar damdawi-in ni lo zinga a tam ber leh Aizawla damdawi-in tam berte empanelment suspend a nih avangin private hospital tam zawkah MR bill a tih theih dawn rih lo a, Mizoram State Health Care Scheme leh PMJAY gold card-te pawh hman theih a ni dawn tawh rih lo tih an sawi a, "Damlo mangang, khawsak harsate'n an tuar tur hi a pawi kan ti a, dik nia kan hriata kan beihna avanga tuartu mipui hriatthiamna kan dil a ni," an ti.
NGHAM chuan, "Kan hospital-te hi damlo enkawl tura siam leh din a nih angin, a ngai angin damlote kan enkawl reng dawn a, MR bill chauh a theih dawn lo a ni," an ti a; sorkara an dil leh ngiatte puangin, 'Hospital hrang hrangte'n rate hman mek hman zui a, damlote'n sorkara an sensote an bill theih zat an bill ve leh mai hi a ni,' tiin an tarlang.
Sorkarin private hospital-te hman tur rate a bituk chu pawm theih chi a nih loh thu sawiin NGHAM chuan, "He rate hi kan hman chuan hospital-te hi hun rei lo têah kan tlakchhiat kan hlauh vang a ni. Kan tlakchhiat hi mipui leh ram tan thil ṭha lo a ni a, hmasawn zel a, ram dang anga mipui tan hospital ṭha chhawpsak hi kan tum a ni," an ti.
NGHAM chuan, sorkar siam scheme hrang hrang an zawmna avangin cheng nuai 300 aia tam bá a la awm thu leh chu chu damdawi-in tam takin an chhiatpui hle tawh thu an sawi a; chutih rualin, inhriatthiam lohnaah Mizoram sorkara thuneitute nena inbe turin an inpeih reng thu an sawi bawk.
Sorkarin empanelment a hlihsakte
1. Synod Hospital, Durtlang
2. Ebenezer Medical Center, Aizawl
3. Aizawl Hospital & Research Center, Aizawl
4. Adventist Hospital, Aizawl
5. LRM Hospital, Aizawl
6. Greenwood Hospital, Aizawl
7. Grace Nursing Home, Aizawl
8. Care Hospital, Aizawl
9. City Hospital, Aizawl
10. Redeem Hospital, Aizawl
11. Mercy Hospital, Serchhip
12. John Williams Hospital, Lunglei
13. Nazareth Hospital, Aizawl
14. Maraland Gospel Centenary Hospital, Saiha
15. DM Hospital, Champhai
16. Alpha Hospital, Aizawl (HCS zawm lo)
17. Bethesda Hospital (suspend-na hlih a ni a, mahse,
NGHAM member nih angin MR an process thei dawn lo)
18. Med Aim Hospital, Champhai (HCS zawm lo)