Mizoram leh Assam Tourism Minister ten Tourism lama thawh dun dan tur an sawi

Tourism minister Lalnghinglova Hmar chuan December 13, Inrinni khan Guwahati-ah Assam Tourism minister Ranjeet Kumar Dass a kâwm a; tourism hmasawnna atana thawhho dan tur sawiin, thawh dun an remti a, remchang hmasaah thawhona thuthlung ziah ni se an ti.

Lalnghinglova Hmar chuan, tun hnaiah Mizoramah khualzin an pun nasat thu leh, khualzin zinga a tam ber chu Assam aṭanga zin an nih thu a sawi a, "Assam sorkar nena tourism hmasawnna kawnga thawhhona neih a ṭul kan ti a. India rama state tê leh mihring tlemna kan ni a, chutihrualin, khualzinin an tlawh duh leh ngainat state nih tumin kan inbuatsaih mek a, Mizoramin a mamawh chu thawhpui (partner) ṭha a ni," a ti. Hla taka mite nena thawhho aiin Assam nena thawhho chuan tourism hmasawnna turin rah ṭha a chhuah an rin thu a sawi.

Ranjeet Kumar Dass chuan, tourism lamah Mizoram nen thawhho ṭha a tih thu a sawi a, "Mizoram hi keini tan state hrang a ni lo a, tun hmaa state pakhata chengho vek kan ni. Mizoram tlawh hi Assam mite hian an châk a, rél a awm tawh bawk nen, mi tam zawk an rawn kal zel kan beisei," a ti.

Inkawmnaah hian state pahnih sorkar hotute'n tourism lama thawhho dan tur hrang hrang an sawiho a; Lalnghinglova Hmar-in Assam tourism hunpui buatsaihah Mizoram tourism chawi lârna tur thlalak leh video te a remchan anga tilâr ve ṭhin tura a ngenna chu tihhlawhtlin an tum tur thu Ranjeet Kumar Dass chuan a sawi.