KHAWTHLIR

KṬP-in thisen pe

December 13, Inrinni khan KṬP, Chaltlang Branch chuan Synod Hospital tan thisen unit 53 an pe a, petute mipa 47 leh hmeichhia paruk an ni. KṬP, Sumsuih Bial pawhin ZMCH tan thisen unit 26 an pe a, petute mipa 21 leh hmeichhia panga an ni.

Award dawng

Krishi Jagran leh ICAR - IARI, Pusa, New Delhi ṭang dun chuan December 7-9, 2025 chhung khan Pusa, New Delhi-ah National Millionaire Farmer’s Award 2025 an sem a; hmarchhak state leh Mizoram aiawhin VL Remruatpuia, Darlak, Mamit district-in award a dawng. Award hi Union Chemicals and Fertilizer minister Jagat Prakash Nadda chuan a hlan a ni.

Tuivaiah tla hlum

Bezalela (37), Vaitin chu December 13, Inrinni chawhma khan Tuivai luiah a tla hlum. Thu dawn danin, Bezalela hi sangha man a tumna lamah chesualin tuiah a tla hlum a, nimin zing dar 8 vel khan a tlakna aṭanga ft 20 velah a ruang hmuh a ni.

SIRDPR jubilee

Rural Development & Administration minister Prof. Lalnilawma chuan December 11, 2025 khan Aijal Club-ah State Institute of Rural Development & Panchayati Raj (SIRDPR) silver jubilee lawmna a hmanpui. Minister hian jubilee souvenir a tlangzarh a; SIRDPR chu thingtlang mite tan hmasawnna thlentu ni zel tura chahin, "Self help group-te'n thil chi hrang hrang zawrh tham tak tak an thar tawh a, SHG-te thil thar chhuah leh siamte hi ‘Selhel’ brand hmanga market tur a ni," a ti.

Mock exercise neih dan tur rel

Lawngtlai District Disaster Management Authority chu bawrhsap Donny Lalruatsanga kaihhruaiin an ṭhukhawm a, mock exercise on fire leh earthquake buatsaih an rel. January 30, 2026-ah LAHAS-ah mock exercise on fire leh LCMC-ah mock exercise on earthquake neih ni se, Sangau leh Chawngte RD Block-ah Febuary, 2026 chhunga neih ni se, Lawngtlai leh Bungtlang RD Block-ah March, 2026 chhunga neih ni bawk se, an ti.