Power transformer lian ber hawng

Mizorama power transformer lian ber, Zuangtuia 132KV Grid Power Sub-Station thar chu nimin khan Power & Electricity (P&E) minister R Lalzirliana'n a hawng.

R Lalzirliana chuan,  "P&E department engi­neer-te leh thawktu zawng zawngte thawhrim rah a ni. Ramin hma a sawn a, kawlphetha mamawh pawh a pung zel a, peak hour-a megawatt 80 vel hmang ṭhin khan tunah chuan megawatt 110-te a thleng tawh. Tuna kan hman mek hi nakin lawkah kan khawpkham loh hun a thleng leh mai dawn. Inzar pharh zelna tur leh hmun dang aanga electric lo lut dawnna hmun neih a pawimawh avangin sorkar ramte humhalh a ṭul hle a ni," a ti.

Sorkar thuchhuah tarlan danin, Mizoramah electric power mamawh-na ni tin a sang zel a, tuna 132KV Sub-Station-a transformer lian awmte'n mipui mamawh a phuhru zo tawh lo. Chumi sutkian nan chuan transformer lian 25MVA, 132/33KV pahnih chu hman theihin Zuangtui Sub-Station tharah bun a ni ta a ni. Transformer lian hi a hmaa hman ṭhin 12.5MVA, 132/33KV aiin a letin a lian zawk.

Zuangtui Sub-Station hi Mizoram páwn aṭanga kawlphetha lak luhna hmunpui a ni a, Aizawl khawpui bakah district dang pakuaah kawlphetha pek chhuah niin, chu chu Mizoramin kawlphetha a hman hmun thuma ṭhena hmun hnih vel a ni.