Mizoram UPC General Assembly a ṭiak; 2026 budget atan cheng vbc 36.57 pawm

Mizoram UPC kohhran inkhawmpui lian ber, General Assembly chuan kum 2026 budget atan cheng vbc 36.57 an pawm. R Dengṭhuama Hall, Mualpuia inkhawmpui hi nizan khan a ṭiak.

Inkhawmpui rorel hi December 12-13, 2025 khan neih a ni a, executive chairman Upa F Lalremmawia'n a kaihruai. Mizoram UPC inkaihhruainaa puipa pali zinga pahnih - executive chairman leh general superintendent chu mi pakhat tan vawi khat aia tam nih theih loh turin an rêl a; kohhran inkaihhruainaa district tia ramri ṭhen chu area tia thlak rawtna an pawm.

Rorel zingah Mizoram UPC member an pun lehzual theih nan Project 2030 neih te, sum hmanna tur langsar zingah biak-in sak ṭanpuina leh pastor quarters sakna turte a tel.

Assembly-ah hian zan lamah revival inkhawm neih a ni a, Inrinni zan khan rawngbawltu mi 15 hnenah ministerial licence hlan a ni. Nimin chawhma inkhawmah general superintendent Rev. P Lalrinawma'n pastor pali a nemnghet bawk.

Inkhawmpui report-a a lan danin, Mizoram UPC-ah hian member 79,249 an awm mek a, kum 2025 chhungin member 2,617-in an pung. Pastor bial 78 awmin, pastor 97 an awm mek a; kum 2025 chhungin hmun 20-ah kohhran thar din a ni.