Catholic Ṭhalai Pawl-in inkhawmpui hmang

Mizoram pum huap Catholic Ṭhalai Pawl inkhawmpui vawi 21-na chu December 11, 2025 aṭang khan St Francis Xavier Parish, Lawngtlaiah neih a ni a, Aizawl bishop Most Rev. Stephen Rotluanga'n hmanpuiin, nizan khan a ṭiak.

CṬP inkhawmpuiah hian December 11 aṭang khan rorel a ni a, Inrinni khan Cultural Day hman a nih bakah, inkhawmpui apianga an tih ṭhin angin khawtlang tana thil ṭha tihna hun an hmang.

CṬP hian Central Young Lai Association hnenah oxygen concentrator an pek bakah, YLA branch 10 hnenah gas stove an pe a; inkhawmpui nghahna YMA, Lawngtlai Vengpui leh New Vengpui hnenah plastic ṭhutthleng an pe. Lawngtlaia khawsak harsa chhungkaw panga tan Krismas chibai bûkna thilpek an hlan bawk.

Inkhawmpuiah hian thupui thlan bik hrang hrang hmangin Pathian thuchah ngaihthlak a ni a; nimin khan mass thianglim neih a nih bakah, thupui sawihona hun hman a ni.