Tuichang Nghakuai Chiah Rûnpui khâr

Tuichang luia Nghakuai Chiah Rûnpui buatsaih chu December 13, Inrinni khan khâr a ni a, kharna hun hi Fisheries minister Lalthansanga'n a hmanpui.

Lalthansanga chuan, YMA-te'n Tuichang lui an humhalh ṭhat avangin nghakuai chiah rûnpui neih theih hial khawpin sangha a tam tih a sawi a, "Fisheries department leh Keiṭum Branch YMA thawhho ṭhinna rah chu Mizoram hmun hrang hranga nghakuai chiahtute tana intihsiakna leh intihthawvenna atan hlawhtling taka hun hman a ni," a ti.

Fisheries Minister chuan, Tuichang lui sangha chu luia nungcha humhalh pawimawhzia inhriattirna remchang tak a nih bakah, zin kawng tinuamtu a nih thu a sawi a, "Lui dung nungcha humhalhna leh a pawimawhzia tihhmuhtu pawimawh tak a ni," a ti a; lui dung humhalhna kawngah Mizote'n hmasawnna tur tam tak an la neih thu a sawi.

Nghakuai Chiah Rûnpui hi December 12, 2025 khan ṭan a ni a, mi eng emaw zatin sangha ṭhahnem tak nghakuai hmangin an man. Sangha mantute chu category hrang hrangah ṭhenin lawmman siam a ni. A kharna inkhawm hi Fisheries joint secretary Zonunthari'n a kaihruai a; Keiṭum VC president TC Lallala leh YMA vice president Jacob Lalrammawia ten thu an sawi bawk.