MNF hi hnam movement kengtu a ni - MNF Treasurer

MNF treasurer K Vanlalauva chuan, MNF party chu Mizo hnam movement kengtu an ni tih sawiin, chu movement avang chuan martar sang chuang an nei tih a sawi.

K Vanlalauva hian MNF party treasurer a nih hnua a vawi khat nan Mizo Hnam Rûna inkhawmah thu a sawi a, "MNF party hi Mizo hnam movement kengtu kan ni a, chu movement avang chuan martar pawh sang eng emaw zat kan nei rêng a ni. Kan hnam pa Pu Laldenga'n inremna kan neih hnua MNF High Command meeting hmasa bera a sawi chu, 'Kan hnam movement vanga nunna chán zawng zawngte hi tute vanga thi nge, tih inzawh buai a ngai lo a, an vaiin hnam martarte an ni tih hi kan zavaia kan hriat ka duh a ni' a tih khan a sawifiah em em a ni," a ti.

MNF Treasurer chuan, MNF president Zoramthanga'n an party leh sorkar a hruai dan chu a lungawithlak hlea a hriat thu sawiin, "Kei pawhin ka theihna zawng zawngin ka back-up dawn a ni," a ti a; MNF treasurer a nih theih chhan chu R Tlanghmingthanga leh Dr R Lalthangliana te inpekna rah a nih thu sawiin, hotute thu awiha ring ngam mi nih a tlo ber thu a sawi.