KHAWTHLIR

Synod Inkhawmpui vawi 96-na chu nimin khan Mission Veng Kohhran biak-inah chhunzawm a ni a, moderator Rev. R Lalchangliana kaihhruaiin ro an rél. Nimin khan general agenda an rél zo a, Synod Executive Committee (SEC) 

aṭanga thu lutte ngaihtuah mekin, vawiinah an chhunzawm leh ang. Pathianni chawhma inkhawmah Moderator-in pastor atan probationary pastor ni lai mi 15 nemnghetin, pro. pastor atana lak thar mi 16-te a dahnghet dawn a ni.

HDFC Bank, Aizawl chuan nimin khan Aizawl Civil Hospital blood bank-ah thisen pek rûnpui an huaihawt a, mipa 30 leh hmeichhia palite'n thisen unit 34 an pe. ṬKP, New Siaha Unit pawhin nimin vêk khan Siaha District Hospital tan thisen unit 14 an pe a, a petute mipa paruk leh hmeichhia pariat an ni.

Mizoram University-a Department of English chuan an kum 40-na, ruby jubilee (1979-2019) hriatreng nan nimin khan Aizawl Civil Hospital-a damlo harsa zawkte ṭanpuina turin Poor Fund-ah Rs. 1,03,588 an hlàn. Sum an pek hi MZU English department-a zirtirtu, alumni leh mi inphalte thawh khawm a ni.

Nuin fa hmasa ber a pai aṭanga a hrin hnu, hna thawk thei loa a awm chhunga mamawh a tlâkchham lohna tur leh nau chunga thihna leh nauchhiat a tlem zawk theihna tura sorkar laipuiin ṭanpuina a duan, Pradhan Mantri Matru Vandana Yojana (PMMVY) chu ICDS, Khawzawl Circle chhunga hmeichhia 495-in an dawng tawh. ICDS, Khawzawl Project tarlan danin, mi 495-te hnenah hian ṭanpuina Rs. 24,75,000 pek a ni tawh a, mi pakhatin Rs. 5,000 zel 

an dawng a ni.

Rural Development department -in Khawzawl Rurban cluster chhunga thingtlang khuate chawi kânna tura kawng hrang hranga hmalakna a kalpui mekah nimin khan Khawzawl BNRGSK Hall-ah Shyama Prasad Mukherji Rurban Mission hnuaiah khuai khawi zirna an buatsaih. Training-ah hian khaw pariat - Arro, Tualpui, Khualen, Tualte, Ngaizawl, Chawngtlai, Neihdawn leh Hmuncheng khuaa khuai kháwi tura thlan mi 40 an tel a ni.

KVK, Lawngtlai chuan nimin khan Bualpui NG khuaah thlasik thlai chíngtute thlai chîn dan kalphung, leiṭha leh hlo túr hman dan te, rannung laka thlai vèn dante an zirtir. KVK hian community nursery aṭangin thlai ṭiak chi hrang hrang an sem nghal a ni.