Tripura - Aizawl inkara gas pipeline phûm December 2027-ah zawh tum

North East Natural Gas Pipeline Grid hnuaia Tripura (Panisagar) aṭanga Mizoram (Sihhmui) inkara gas pipe phûm chu December 2027-ah zawh hman tum a ni a; pipe zawm (welding) hna 45% leh phûm hna 33% zawh a ni tawh.

Chief minister Lalduhoma chuan nimin khan a pisaah Tripura leh Mizoram inkara gas pipeline phûm hna thawktu Indradhanush Gas Grid Limited (IGGL) chief executive officer Subrata Das leh a thawhpuite a kâwm a; an hnathawh chinte sawipuiin, harsatna an tawhte a ngaihthlaksak.

IGGL hotute sawi danin, gas pipeline hi Tripura state-a Panisagar Receiving Terminal aṭanga kal ṭan a ni a, Mizorama Kanhmun - Zawlnuam - Kawrthah - Tuidam - Darlak paltlangin Mamit bulah a chhuak. Mamit aṭangin Lengteah a kal zel a, Sihhmuiah receiving terminal dah tur a ni. Sihhmui Receiving Terminal aṭanga Aizawl khawpui chhung in tina pek (household connection) chu Tripura Natural Gas Corporation-in an thawk ang.

Panisagar aṭanga Sihhmui thlenga kal tur gas pipeline hi km. 119.5-a thui niin, pipe len zawng chu feet khat bial a ni a; kum 2027 December thlaah thawh zawh hman an tum. Tun thlengin welding hna 45% leh pipe phûm hna (lowering) 33% thawh a ni tawh.

He project hi North East Natural Gas Pipeline Grid hnuaia hmalakna niin, Panisagar leh Sihhmui inkar hi Phase II hnuaia hmalakna pakhat a ni a; Phase II hmalakna pumpui hian Guwahati - Agartala - Aizawl pipeline a huam a, a vaiin km. 723-a thui a ni.