CAB hi insuihkhawma do a ngai - NPP President

National People’s Party (NPP), Mizoram State Unit hruaitute chuan nimin khan Aizawl Press Club-ah thuthar thehdarhtute an kâwm a; an president Hmingdailova Khiangte chuan, Citizenship Amendment Bill (CAB) do turin hmun khata insuihkhawm a, hnam leh sakhua rilru púa do a ngaih thu a sawi.

Hmingdailova Khiangte chuan, CAB chu an party-in an duh loh thu sawiin, "November 30 khan Delhi-ah Executive Committee meeting kan nei a, chutah chuan CAB duh lohna resolution kan pass a ni. NPP chuan CAB hi a dodal zel dawn," a ti. 

CAB chungchanga ziaka intiamna a awm loh chuan lungawi chî nia an hriat loh thu sawiin Hmingdailova chuan, "Mizoramin hmarchhak state dangte angin CAB a dodal tâwk lo. Khawvel hriat phak khawpin kan la do lo em aw, a tih theih a, hun ṭha pahnih kan khawhral tawh a ni," a ti a; NPP-in CAB doa an hmalak zel dan tur chu an hotute ruahman anga an kalpui tur thu leh tunah chuan sawi theih a neih loh thu a sawi.

NPP chu India hmarchhak pum huapa ding a nih avangin hmarchhak state aiawha ding thei a nih thu Hmingdailova Khiangte chuan sawiin, "Hmarchhak state pasarihah NPP-in rorelna a chan chuan state ramri buaite hi a chinfel theih ang. Delhi lamah pawh MP 25 vel kan neih theih dawn avangin min ngai pawimawh tawh ang," a ti.

Mizoram NPP President chuan, NPP chu May 7, 2019-ah national party nihna pek a nih avangin, New Delhi-ah party office pek an nih thu leh luah tura ruahman mek a nih thu a sawi a ni.