2026-27 Synod budget vbc. 543.31; Kum kal mekah vbc 242.35 hmu tawh

Mizoram Synod chuan sum kum (financial year) kal mek 2025-26-ah April-October 2025 chhungin Rs 2,42,35,88,129 (vbc 242.35) an hmu. Kum 2026-27 budget atan Rs 5,43,31,53,000 (vbc. 543.31) an pawm.

Synod Inkhawmpui vawi 102-na neih zawh taka Synod finance officer Rev. Dr K Lallawmzuala'n sum dinhmun a tarlan danin, Mizoram Synod hian April-October 2025, thla sarih chhungin Rs 2,42,35,88,129 an hmu a; chungte chu Pastoral-ah Rs 1,42,60,55,314 leh Mission-ah Rs 99,75,32,185 a ni.

Kumina Synod Inkhawmpuiah December 13, Inrinni khan kum 2026-27 chhunga Synod budget pawm a ni a, a vaiin Rs 5,43,31,53,000 a ni. Synod budget thar hi Pastoral-ah Rs 3,37,39,83,000 leh Mission-ah Rs 2,05,91,70,000 a ni a; ruihhlo ngaite enkawlna hmun Jordan Centre, Seṭhâwn pualin Grant-in-Aid no. 54-ah Rs 2,00,00,000 (nuai 200) dah an remti nghal bawk.