Sorkarin tuihna humhalh turin hma a la mek - PHE Minister

Public Health Engineering (PHE) minister Prof Lalnilawma chuan nimin khan Tlungvel Multi Village (Tlungvel & Darlawng) Water Supply Scheme, Tuirini Grid Pumping a hawng a; sorkarin tuihna humhalh turin hma a lak mek thu a sawi.

Prof. Lalnilawma chuan, Rural Development department kaltlangin sorkarin tuihna humhalh turin hma a lak mek thu a sawi a, "Sorkar hmalakna mipuiin nasa lehzuala kan ṭawiawm bakah, mipuite’n theihtawp kan chhuah a ṭul. Tuihnate a kum telin a kang a, a tlahniam telh telh niin a lang. Kan ramngaw bakah, kan lui te, kan nungcha te kan humhalh a, duat taka kan enkawl a tul," a ti.

ZPM-in sorkarna an chan aṭangin Chief Minister hoin minister-te'n theihtawp an chhuah thu sawiin Lalnilawma chuan, "CM-in mipuite tui thianghlim hnianghnar zawk a pek a ngai pawimawh a, chumi tihlawhtling tur chuan PHE minister ka nih angin, PHE department-a thawkte nen theihtawp kan chhuah," a ti a, an thawhhona a ṭhat thu a sawi.

PHE Minister chuan, leivûng leh bawlhhlawh paih danah fimkhur lehzual a ṭul thu sawiin, "Leivung leh bawlhhlawh kan paih fimkhur loh avang leh, kan luite tibawlhlawh thei zawnga kan paih ṭhin avangin fûr laiin harsatna kan tâwk nasa ṭhin. Sorkar emaw khawtlang hruaitute'n kan leivung leh bawlhhlawh paih min enpuiin min veng reng hman lo, Mizoram hi kan ram a nih angin keimahni ṭheuh hi kan rinawm a ngai," a ti.

Tlungvel Multi Village (Tlungvel & Darlawng) WSS, Tuirini Grid Pumping hi Jal Jeevan Mission hnuaia thawh a ni a, cheng nuai 1,342 senga siam niin, mi 5,210 châwm thei tura ruahman a ni.