Civil Hospital hnenah khawl 2 hlan

Urban Development & Poverty Alleviation (UDPA) minister K Sapdanga chuan nimin khan Aizawl Smart City Limited-in Civil Hospital, Aizawl tana khawl thar pahnih - Anesthesia Workstation leh Upper Gastrointestinal Video Endoscope Unit an pekte a hlan.

Anesthesia Workstation hi cheng nuai 35.70 man niin, Upper Gastrointestinal Video Endoscope Unit-te chu nuai 22 man a ni a; UDPA Minister hian Health minister Lalrinpuii hnenah Memorandum of Agreement for Anesthesia Work Station and Upper GE Scope a hlan a ni.

K Sapdanga chuan, hun rei lo te chhunga hospital establishment hrang hrang an fan kualna aṭangin khawl leh thawktute buaizia leh indaih lohzia an hmuh thu a sawi a, "Heti chung hian department dang zawng aiin sawiselna leh demna in dawng hnem ṭhin mai thei. Sawiselna leh demna in dawn chângin lunghnûr mai lo u la, in hnathawh ropuizia te, nunna hlutzia leh inthlahdah zeuh pawizia hre rengin, chhel takin, hmangaihna leh lainatna rilru nen missionary rilru puin thawk zel ang che u," a ti a; Civil Hospital tan Aizawl Smart City hotute an inhawn viau thu a sawi.

Lalrinpuii pawhin thu sawiin, Aizawl Smart City Limited-in Civil Hospital, Aizawl hnena khawl a pek tawhte chu mipuiin an hman ṭangkai thu a sawi a, "MRI khawl ringawtah pawh kumin June thla aṭang khan mi 1,300 en an ni tawh a, khawl thar changkang tak tak kan nei hian thawktute pawh a tiphûr hle a ni," a ti.

Khawl inhlanna hun hi Civil Hospital, Aizawl Doctors’ Seminar Room-ah neih niin, UDPA secretary Lalmalsawma Pachuau-in a kaihruai a; Aizawl Smart City chief executive officer CC Lalchhuangkima, Civil Hospital Aizawl senior medical superintendent Dr Lalchhuankimi leh sorkar hotu dangte an tel.

Minister pahnih hian Aizawl Smart City-in Civil Hospital, Aizawl hnena June 2025-a MRI leh khawl dang 24 an lo pek tawhte an en kual a; thawktute'n khawl an hman dan leh mipuiin an ṭangkaipui dante an hrilhfiah a ni.