Japan mithiamte'n Mizo coach-te thil chi hrang hrang zirtir dawn

Mizoram infiamna hmelhmang thlak danglam tura hmalakna kal meka Mizo coach-te intuaitharna tur, 'Transforming Sport for the Next Generation: Developing Decision Makers' chu nimin khan Sports minister Lalnghinglova Hmar-in Hawla Indoor Stadium-ah a hawng. He programme hnuaiah hian Japan mithiamte'n Mizo coach-te ni li chhung thil pawimawh hrang hrang an zirtir dawn.

Mizoram State Sports Council, Nippon Sports Science University (NSSU) leh Japan International Cooperation Agency (JICA) te buatsaih, coach-te intuaitharna atan hian NSSU, Japan aṭangin Prof. Masamitsu Ito, NSSU project director Eiji Wakamatsu bakah, JICA aṭangin India senior representative Mikinori Hirano leh additional lead project officer Joyota Rabha te an rawn kal a ni.

Sports Minister chuan, zirlai ṭha nei turin zirtirtu ṭha neih a ngai tih sawiin, "Coach ṭha kan neih chuan sport lamah hma kan sawn thei ang. Tuna kan awm dan ngai reng a nih chuan kan result a ngai reng dawn a, kan intuaihriam a, hmasawn kan tum a ngai. India-in hma a sawn a, chu hmasawnnaa kan tel ve loh chuan National Games-ah 28-na velah kan tei kan tei reng a nih hi," a ti.

Lalnghinglova Hmar chuan, infiamna hmunhmaa hmasawn ringawt a tâwk lo tih sawiin, "Sport coaching kan chawikan a ṭul. Sport lama hmasawn turin mithiamte aṭanga zirtirna kan mamawh. Khawvel huapa lang tur chuan talent ringawt a tâwk zo lo. Mizote'n talent nei ṭha mah ila, coach kan neih ṭhat loh chuan khawvel huapa lan a har," a ti a; khawvel huap mithiam rawn kal chu chhawr ṭangkai turin coach-te a chah.

Eiji Wakamatsu pawhin thu sawiin, "JICA-in Mizoramah hna hrang hrang a thawk tawh ṭhin. Tun hi sport lama thawhhona hmasa ber a ni. Mizoram Sports Minister-in ṭhahnemngai takin a bei a, vawi eng emaw zat kan meeting a, tunah a tak a chang ta. Mizoram hian infiamna lamah theihna sang tak a nei a, kan thawhona hmangin hma kan sawn ngei kan beisei," a ti.

Inkhawm hi MSSC secretary Henry C Lalrawnkima'n a kaihruai a, senrio sports promotion officer Alber Lalnunpuai'n an inbuatsaih dan tlangpui a sawi.

Japan mithiamte hian MSSC leh Sports department-a coach mi 40 vel chu coaching tana thil pawimawhte an zirtir dawn a ni.