KHAWTHLIR

Mizoram Statistical Handbook 2024

Economics & Statistics buatsaih Mizoram Statistical Handbook 2024 chu nimin khan CMO conference hall-ah sorkara commissioner Vanlaldina Fanai-in a tlangzarh. Handbook hi vawiin aṭangin Economics & Statistic Directorate, GE Branch-ah bu khat Rs 100-in lei theih a ni ang.

Chetsualnaah thi

December 14, Pathianni chhun dar 12:50 vel khan Rorelliana, Chàmring chu lirtheia chetsualna vangin a thi a, nimin khan vui a ni. Rorelliana hi Alto car-in a nupui fanaute bakah, a pizawn leh a puzawnte nen Sialsukah chaw ei turin an kal a; Chamring dai, Vaiáwt pelhah kawng thlangah an tlan liam a ni. Chetsualna hmunah Rorelliana a thi a, a pizawn leh puzawn pawh an hliam a; a nupui fanaute chu ngaihtuahawm an ni lo.

Minister pualin hun hmangho

Women & Child Development Directorate chuan nimin khan Hotel Ransam-ah ‘A day with our Minister’ an buatsaih a, anmahni enkawltu minister Lalrinpuii nen hun an hmangho. WCD hmalaknate chipchiar taka thlirho a ni a, thawktute infuihtharna hun hman a ni bawk.

Hraisua Dipaw Fest

Mara Autonomous District Council-a Environment, Forest and Climate Change department buatsaihin nimin khan Hraisua Dipaw Festival vawi thumna Hraisua Hills-ah hman a ni a, MADC chief executive member M Laikaw-a'n a hawng. M Laikaw chuan, Hraisua Hills chu lên khawthawnna tur leh chawlh hahdamna tur a nih thu sawiin, a enkawlna leh faina chungchangah sorkar hmalakna ngaichang tur leh, park chu fai taka kalsan ṭhin turin mipui a chah.

MHIP-in an phût

MHIP General Headquarters chuan thuchhuah siamin, December 13, 2025-a thia chhar Marina Lalchhanchhuahi, Tanhril kutthlaktu man chhuak a, a phu tâwka hrem ngei an duh thu leh an phût thu an tarlang. Mizo hmeichhe chunga pawikhawihna a thleng ṭhin chu an tawrh thiam loh thu leh, tun hnuah a thlen tawh loh nan a ṭul anga hmalak zel an tum thu an sawi bawk.