Traffic SP-in kea kalna dâla lirthei dah lo turin a hriattir

Aizawl Traffic SP C Vanlalvena chuan, Aizawlah kea kalte him zawk nan leh harsatna an tawh loh nan lirthei neitute chu an lirthei hman dan leh dah (park) danah fimkhur tur leh, kea kalna dâla dah lo turin a hriattir.

Kea kalna (footpath)-a lirthei dah hnawkte chu Traffic Control Room phone number 9366553559-ah registration number langin lirthei thlalak leh an dahna hmun hriattir zel turin Traffic SP chuan mipui a ngen.

Traffic SP chuan, The Motor Vehicles Act, 1988 Section 122 leh The Motor Vehicles (Driving) Regulations, 2017 Section 39 ten mihring kalna tura siam (footpath)-ah lirthei khalh/dah emaw, kea kalte tana hnawk khawpa footpath rapa lirthei dahte a khap a, "Dan bawhchhiate chu MV Act Section 177 hmanga hrem theih an ni. Lirthei khalhtute footpath-a lirthei dah lo turin kan inhriattir a, hei hian rei lo tê dah zawk pawh a huam vek a ni," a ti.

Tunlaiin lirthei neitu ṭhenkhatin dan an bawhchhiat thu leh pawisa chawi tur zat hriattirna Whatsapp message hmangin an dawng ṭhin a, link click/open tur dah tel a nih ṭhin thu tarlangin, hei hi pawisa thila inbumna nia hriat a nih thu leh message an dawng a nih chuan delete nghal zel turin lirthei neitute a chah bawk.