Cheng nuai 5985 hû project thehlut tawh

Veterinary, Fishery & Sericulture Board chu nimin khan an chairman Dr K Beichhua, minister of state hoin a pisaah an ṭhukhawm. Board hma­lak tawhna leh hmachhawpte an sawiho a; Fishe­ries department hnuai­ah kum 2019-20 chhungin Socio Economic Development Prog­ramme (SEDP) kaltlangin project hrang hrang cheng nuai 5985 hû thehluh a nih tawh thu an tarlang. 

Minister Dr K Beichhua chuan, Mizoram hmasawnna turin SEDP kalpui a nih thu leh development board hrang hrang zingah Veterinary, Fishery and Sericulture Board chu ei leh bara intodelh theih nan a pawimawh thu a sawi a; Board-in a huam department-a mithiamte chu Mizoram hmasawnna turin an theihna leh thiamnate hlâwk zawka hman a nih theih nan theihtawp chhuah turin a chah.

Board vice chairman C Lalmuanpuia, MLA pawhin thu sawiin, SEDP kaltlanga department ṭhenkhat hmalaknate a tarlang a; Animal Husbandry & Veterinary depart­ment secretary Lal­thangpuia Sailo-in sor­kar thuchhuak anga SEDP hnuaia mawh­phurhna inkhaidiat dan leh inrêlbàwl dan turte a sawi. 

Veterinary, Fishery & Sericulture Board-ah hian Fisheries department hnuaiah crab farming atan cheng nuai 57 leh sangha chi leh lènte subsidise rate-a pek chhuah nan cheng nuai 100.40 pawm a nih thu tarlan a ni. AH&Vety department kaltlangin State Planning Board, Monitoring & Surveillance Com­mittee-in district hrang hranga vawk leh ar vulh tihchangtlun nan leh Zokhawthara quarantine camp/station sak nan cheng nuai 1895.28 a pawm thu tarlan a ni bawk.