Home Guards & Civil Defence Raising Day vawi 57-na lawm a ni

Home minister Lalchamliana hoin nimin khan Central Training Institute (CTI), Sesawngah Home Guards & Civil Defence din champha, Raising Day vawi 57-na lawm a ni.

Home Minister chuan, home guard leh civil defence-te chu sipai tak tak anga a kúl a táia ram venhimna hna thawk tura din ni lo mah se, mahni inpe a, ram chhung venhim hna thawktu sipaite a ṭul anga thlâwp leh mipui vantlang rawngbawla theihtawp chhuah ṭhin an nih thu a sawi a, "State tam takah venhimna hna an thawh ṭhin bakah, chhiatrupna leh chetsual palh rîkrum thilah an ṭangkai hle a ni," a ti.

Lalchamliana chuan, MRHGCD thupui, 'Mahni inphata mi dangte tana nun' tih chu ropui a tih thu sawiin, "He thupui hi MRHGCD vo­lun­teer-te chauh ni loin, mi tin hian nunpui ṭheuh thei ila a duhawm hle," a ti a; MRHGCD volunteer-te chu uniform ha an nih ang ngeia inthununna ṭha taka vawn chu an nihnain a ken tel a nih thu a sawi.

All India Home Guard & Civil Defence Raising Day hi December 6, 1962 a ni a, Mi­zoramah chuan March 1964 khan Hon. Lt. Lalmawia leh Mizorama ex-servicemen ṭhahnemngai ṭhenkhatin an din a, kum 1966-a Mizoram buai vangin eng emaw chen tihtawp a ni. Sorkar laipui ruahmannain December 6, 1971 khan din ṭhat leh a ni.

A tirah chuan Assam Home Guard hnuaiah a awm a, March 1973 aṭangin Mizoram Home Guards tia vuah a ni. Training-na hmun atan Aizawla Republic Veng Field an hmang ṭhin a, kum 1977 khan ITI Veng, Aizawlah Regional Training Centre din a ni a, kum 1991 aṭangin Central Training Institute (CTI), Sesawngah an insawn leh a ni.