Lunglei DC hoin hunpuia venhimna kalpui dan tur sawiho a ni

Lunglei DC K Lalrinzuali kaihhruaiin a pisaah kumin Krismas leh kumthar vuakvêta venhimna kalpui dan tur sawihona a ni a; DC chuan, November 19, 2019-ah thupek a chhuah tawh angin, Lunglei district-ah hâlpuah, hâlmawi leh puak thei thil dang, boruak ṭha lo siam thei leh ri bengchheng siam theite leh silai lem a mu nei chite lâk luh, zawrh, hralh, hâl leh hman khap a nih thu a sawi.

Lunglei Bawrhsap chuan, Krismas vuakvêta sorkar khap thilte chu ti lui lo turin mipui a ngen a; district mipuite'n hriselna ṭha an neih theih nan leh Krismas leh kumthar hlim tláng tak leh thlamuang taka hman a nih theih nan thupek chu khauh taka bawhzui ngei a nih tur thu a sawi.

Lunglei DC chuan, halpuah leh a kaihnnawihte leh silai lem, a mu kâp chhuak theite khap khapna bawhzuinaah khawtlang hruaitu te, tlawmngai pawlte leh Lunglei district mipuite chu thawhpuiah a sáwm a, mahni zâwn ṭheuha hma la turin a ngen.Krismas leh kumthar vuakvêta venhimna, dan leh thupek kengkawh turin magistrate an duty tur thu a sawi a; sipai (BSF leh AR)-te chu civil mite hnenah hâlpuah leh zú pe chhuak lo tura hriattir an nih tur thu a sawi bawk. 

Meeting-ah hian Lunglei SP C Lalthanmawia leh police hotu dang te, magistrate te, YMA, MUP, MHIP leh V/C Association hruaitute an tel a; Lunglei SP-in Krismas leh kumthar vuakvêta venhimna kalpui tura ruahmannate a sawifiah.