Faina lama national award dawngtu Laltharzeli'n press mite a kâwm

Ministry of Drinking Water Jal Shakti-in September 6, 2019-a ram puma mimal faina kawnga thawk ṭhate chawimawhna a hlana women category-a National Award dawngtu Laltharzeli w/o Lalrinsanga, Mamit chuan nimin kha Aizawl Press Club-ah thuthar thehdarhtute a kâwm a, "Mamit district hi endik dawn chauha fai tur ni loin, engtik lai pawha fai turin Children Sanitation Club (CSC)-te'n hma an la mek," a ti.

Laltharzeli chuan, Mamit district chu endik dawn chauha fai tur ni loin, engtik lai pawha fai turin Children Sanitation Club (CSC)-te'n hma an lak mek thu a sawi a, "Tun aṭanga kum 10-ah chuan campaign ngai loin naupangte thinglungah fai hlutna kan tuh thei ang. PHE department-in kan mammawh ang zelin zau takin min thawhpuia kan lawm hle a ni," a ti a; national award chu PHE department hmalakna vanga dawng thei a nih thu a sawi.

Laltharzeli ṭawiawmtu PHE system analysis Helen Saibuangi chuan, PHE department hmalakna hrang hrangte a sawi a; sorkar laipui aṭanga tehna hrang hrangah state thawk ṭha lawmman Mizoramin a dawng chu thawktute inpekna leh an huam chhunga awmte thlàwpna vang a nih thu a sawi bawk.

Laltharzeli hi PHE department chuan Mamit district tan ambassador-ah an hmang a, Mamit khawpui leh district chhunga thingtlang khaw hrang hrangah faina kawnga hma latu tur Children Sanitation Club (CSC) 87 a din tawh. CSC din hmasak ber, Mamit Bazar Veng CSC chu kum thum chhung kalpui a ni tawh a, chawlhkar khatah vawi hnih faina hnatlang a neihpui ṭhin a ni. Laltharzeli chuan, hmun hrang hrangah CSC din belh zel an tum thu a sawi.