Health Care-ah mipuite'n harsatna an tawh loh nan Sorkarin theihtawp a chhuah dawn - Health Secy.

Health secretary H Laleng-mawia chuan Inrinni khan Aizawl Civil Hospital medical superintendent pisa-ah thuthar thehdarhtute kawmin, Health Care Scheme (HCS) kalpui turah sorkar leh private damdawi-in neitute thu a inhmuh theih loh avanga mipuiten harsatna an tawh loh nan sorkarin theihtawp a chhuah dawn tih a sawi.

H Lalengmawia chuan HCS zawm thei lo damdawi-inte chu sorkarin empanelled hospital an nihna a hlih sak thu sawiin, "Heng damdawi-ina inenkawlte chu anmahni senso veka an in enkawl a ngai tawh dawn. HCS atana sorkarin rate a bituk hi sorkar laipui HCS zulzuia, tunlai mil tura siam a ni. Damloten damdawi-in a an inenkawlna senso an hmuh let leh vek theih dawn avangin damlote hamṭhatna tur liau liau a ni," a ti. 

Damlo enkawlna rate bituk chu Mizoram State Health Care Society kutah dah a nih thu sawiin Health Secretary chuan, "Anni hian Mizoram chhung leh pawna empanel hospital-te be rawnin May 7, 2019 khan Mizoram pawna damdawi-inte meeting neihpui a ni a, a tuk May 8-ah Mizoram chhunga damdawi-inte nen biak leh an ni," a ti a, damdawi-inte chu rate kalphung leh a phena thil awmte hrilhfiah an nih thu a sawi.

Health Secretary sawi danin, ni 15 chhunga Central Government Health Scheme zulzuia rate an duh dan thehlut tura chah ni mah se, Mizoram chhunga damdawi-inte chu an ngawih tlat avangin hun tawp an siam May 31, 2019 khan an pawl president hnenah an rawtna thehlut tura hriattir leh a ni a, he mi hnu hian CGHS rate aṭanga 100% vela tamin an thehlut a ni.

Damdawi-inte rate thehluh hi ṭum engemawzat sawiho a nih hnuah tuna ruahmanna hi an pawm tlang a, inrem veka an inngaih hnuah thuthar an neih leh avangin he buaina hi a lo chhuak ta a ni. H Lalengmawia chuan, rate bituk siam a nih avang hian damdawi in hrang hrangte chu angkhat veka en tur tihna a ni lo tih sawiin, "Clinical Establishment Act hman hunah phei chuan damdawi-inte chu an service pek azira grade hrang hranga ṭhen tur a ni a, hei hi tunah pawh siamfel vek tawh niin, tuna rate bituk hi lo hmang ta pawh ni se, a ṭha lo lai a awm a nih chuan ennawn theih tura ruahman a ni," a ti.

Hriat theih chinah RSBY hnuaiah ba a awm tawh lo tih sawiin Health Secretary chuan, "Hun kal tawha ba a awm nia sawi cheng vbc. 3 vel chu health care ṭantira Reliance Company-in bill a pek loh Court-a thubuai kal mek a ni a, hei hi a nihna takah chuan company ba a ni," a ti a, tuna buaina hi mipui harsatna thlen theitu a nih avangin damdawi-in neitute chu ngaihtuahna thar hmang turin a sawm. Health department hotute sawi danin, Inrinni thleng khan HCS zawm tawh private damdawi-in 13 a awm a ni.