MSU-in dan loa khaw din zirchianna report Chief Minister hnanah an thlen

Mizo Students’ Union (MSU) Gen. Hqrs hruaitute chuan nimin khan chief minister Lalduhoma a pisaah an hmu a, Mizorama dan loa khaw din chungchang an zirchianna report an pek bakah, zirna kaihhnawih thil hrang hrang an thlen.

MSU hian December 8-10, 2025 chhung khan Mizorama dan loa khaw dinte a hmunah an enfiah a, report an siam chu CM an pe a ni. CM Lalduhoma chuan, dan loa khaw din chungchanga MSU hmalakna chu ṭha a tih thu sawiin, Cabinet meeting-in an ngaihtuah tur thu leh, khaw sât thar an awmin fimkhur a ngaih thu sawi.

Chief Minister hnenah hian MSU hruaitute chuan casual teacher-te dinhmun (job security), higher secondary school leh college zirtirtu nghet lak (direct recruitment), Mizoram sorkara inziak lut sikulte grade system siam leh cess aṭanga Education sector-in a chan tur zat chungchangte an thlen. CM chuan, MSU thu thlente chu a theih anga a bawhzui tur thu a lo hrilh niin MSU chuan an tarlang.

MSU hruaitute hian college study tour atan sum dah tihpun chungchanga an hmalakna te, Mizo hming hawha hnam dang dawrkaite leh ILP chungchangte Chief Minister an sawipui bawk.