CM-in sorkar laipui a dawr

Chief minister Zoramthanga chuan November 6, Zirtawpni khan Union Minister of Road Transport and Highways Nitin Gadkari, Union Tourism minister Prahlad Singh Patel leh NITI Aayog vice chairman Rajiv Kumar-te New Delhi-ah a kawm.

Zoramthanga hian Nitin Gadkari chu a chenna inah kawmin, Aizawl khawpui helna tur Sairang - Zemabawk kawngpui tharte, Seling - Kawlkulh - Champhai kawngpui thar sial chungchang te, Kawlkulh -Tuivai kawngpui chungchang te, JICA hnuaia kawng thar sial chungchang te, Durtlang Leitan - Sihphir leh Serkhan - Bagha kawngpui siamṭhat chungchangte leh lei (bridge) hlui leh chak tawk tawh lote RCC lei a thlak chungchangte a sawipui.

Chief Minister hian Union Tourism Minister chu a pisaah a kawmin, Mizoramin khualzinte hip thei tur ram mawi, boruak thiang tak leh ralmuang tak a neih thu te, a mi chengte pawh khualzinte chunga hawihhawm leh ṭhat chhuah ṭhin an nih thute a sawipui a, Mizoram tan Comprehensive Tourism Master Plan siam tur leh project awm sa North East Circuit at Mizoram chu pawmpui turin a ngen a ni.

NITI Aayog vice chairman Rajiv Kumar leh Chief Minister hian carbon trading chungchang te, national bamboo mission hnuaia rua leh mau chin chungchangte leh bamboo link road chungchangte an sawi dun a ni. NITI Aayog Vice Chairman chuan Chief Minister thu thlente chu a lo enzui tur thu leh a theihna kawng apianga puih a inhuam thu a hrilh. Chief Minister hi minister TJ Lalnuntluanga, Planning Board vice chairman H Rammawi leh officer dangten 

an ṭawiawm.