Synod-in CAB a duh lo

December 3 aṭanga neih ṭan Synod Inkhawmpui vawi 96-na chu nizan khan a ṭiak. Synod khawmpui chuan Citizenship Amendment Bill (CAB) hman a nih lohna atana hmalak an rel. 

Synod Inkhawmpui chuan CAB hman a nih lohna atan kawng thumin hmalak an rel a, chungte chu - press release siam, December 8 (Pathianni) zan inkhawma tualchhung kohhran hrang hrangte ṭawngṭai leh Aizawl khawpui chhung hmun 10-a banner leh poster tarte a ni. Synod chuan thuchhuah hi an siam tawh a, CAB pass a nih lohna atan Mizoram mipuite chu theihtawpa ṭawngṭai turin an ngen.

Synod thuchhuah chuan khawmpuiin Parliament-a sorkar laipuiin CAB putluh a tum chu ṭha a tih loh thu tarlangin, "A chhan chu he bill hi pass a nih chuan kan ram tana harsatna leh chimralna hmanrua a nih theih avangin Mizoram Presbyterian Synod chuan ṭha a ti lo a ni," a ti.