Dec 10-ah CAB dodalna atan total bandh

MZP chuan North East Students Organisation (NESO) thurel angin naktuk, December 10 hian Citizenship Amendment Bill (CAB) dodalna atan total bandh an huaihawt dawn. 

Vanglaini palai zawhna chhangin MZP president B Vanlaltana chuan total bandh hi Aizawlah buatsaih a nih tur thu a sawi a, "Lungleiah pawh an theih chuan total bandh an kalpui ang. Hmun dangah chuan bandh an huaihawt thei lo a nih pawhin programme engemaw tal siam turin kan in ngen," a ti.

Total bandh hian zing dar 6 aṭanga tlai dar 4 thleng a awh dawn a, chanchinbumi, chanchinbu sem, venhimna hna thawktute (police), PHE tui sem, damdawi-ina thawk, bawnghnute sem leh Power & Electricity department-a emer-gency-a hnathawkte a huam lo ang.

NESO-in CAB dodalna atana December 10-a hmarchhak state zawng zawnga total bandh huaihawt an tum chung­chang MZP-te chuan Inrinni khan an ngaihtuah a, total bandh hi huaihawt ve nise, an ti. MZP chuan thu­chhuah siamin, India sorkarin hmarchhaka ILP hmanna state pathumte leh Sixth Schedule area-te CAB huamtir loh a tum tih thu awm chu tawk an tih loh thu tarlangin, "Ṭhenawm state-ah CAB an hmang tho a nih chuan Mizoram pawh a tuartu a ni thei tih hi kan ngaihdan a ni. CAB-in ILP hmanna Mizoram a huam loh avanga a lawmawm a nih pawhin, MZP chuan chu aia lawmawm zawk chu zawn zel ṭha a ti a ni," an ti.

Hmarchhak mipuite'n lungrual taka CAB kan dodal theih avangin India pawhin a hai der thei lo tih tarlangin MZP chuan, "Chutih laia hmun ṭhenkhat huamtir loa hmun ṭhenkhat huamtir si tumna a awm a nih chuan, chu chu hmar­chhak mipuite inlung­rualna tihchhiat tuma India chetnaah kan ngai," an ti a, Mizo mipuite inlungrualna bakah hmarchhak inlungrualna chu CAB chungchanga thil ṭulah an ngaih thu an sawi. MZP chuan India sorkarin CAB a kalpui danah India hmarchhakte ṭhen darhna tur nia ngaih a nih avanga December 6, 2019-a MZP telna NESO hruaitute ṭhukhawmin India hmarchhak puma total bandh neih an rel chu Mizoram tan leh hmarchhak pum tan ṭul a tiin tihhlawhtlin ngei nise an tih thu tarlangin, CAB dodalna total bandh neih tur hi ram leh hnam him nana thlawp turin Mizo mipuite an ngen.

MZP tarlan danin, NESO chuan India hmar­chhak state ṭhen­khata CAB hman loh tur tih leh hmun ṭhenkhata hman tum si chu hmarchhak mipuite inlungrualna tihchhiat tumna leh ṭhen darh tumnaah a ngai. Hmarchhak mipuite nekchepna leh ram leilung fate aia ram pawn lam mite uchuak taka duhsakna lantirna tur a ni ngei tih hi NESO ngaihdan a ni. CAB hi sakhaw ṭhenkhat thleibikna leh India Constitution kalh a ni.

Mizoram chu CAB huamtir kan nih loh laia ṭhenawm state-te CAB-in a huam tho si chuan, ṭhenawm state-ah NRC an hmanin Mizoram hi nasa takin min nghawng dante ngaihtuahin, MZP chuan CAB hi dodal zel ṭul a ti a ni. CAB hian Mizoram min huam lo ta pawh ni se, kan ṭhenawm state-te a nghawng dawn avangin kan ngaihṭhat bik ngawt a rem lo.

NESO hian ṭangrual­in Mizoram leh state ṭhenkhat tan hma a la ṭhin a, kum 1994-a India sorkarin ILP hlih a tum lai, Mizo mipuite kan mangan lai pawhin ILP nei ve lo NESO-a telte'n NESO hmingin theihtawpin min lo pui tawh a ni. ILP hmang ve lo state-te chu anmahni an him avanga ngawi mai loin, na taka min thinurpuiin, kum 1994 khan lungrual takin NESO hian hmarchhakah total bandh a lo huaihawt tawh a ni.