KHAWTHLIR

Mizoram State Games 2019 chu vawiin chawhnu dar 3:30 hian Rajiv Gandhi Stadium-ah chief minister Zoramthanga'n a hawng dawn a, games hian December 13 thleng a awh ang. State Games hi official chuan vawiinah hawn tur nimah se, discipline ṭhenkhat chu kar hmasa aṭang khan khelh a ni tawh.

November 6, Zirtawpni zan khan Mizoram Science Centre auditorium-ah Planning secretary Dr C Vanlalramsanga'n 'Mizoram Science Centre Winter Programme, 2019' a hawng.  Dr C Vanlalramsanga chuan Mizoram Science Centre-in science zirna lamah hna pawimawh tak a thawh thu sawiin Winter Programme, 2019 an buatsaih theite chu a lawmpui thu a sawi a,''Science & Technology chu mimal leh ram hmasawnna hnuk pawimawh tak a ni," a ti. Winter Programme, 2019 hi December thla chhung zirlaite bakah mipui mimir tan kartluanin zan dar 8 thleng tlawh theih a ni dawn a ni.

Lunglei SP chuan thupek chhuahin Haulawng leh Pukpui inkar kawng PWD-te'n uluk takin resurfacing hna an thawk ṭan a nih avangin helai kawngah hian medium motor vehicle chin chung lam tan zing dar 8:30 aṭanga tlai 5:30 inkar chhung hian tlan phal a nih loh thu a tarlang. Oil tanker leh LPG phur lirtheite erawh chu a ṭul dan azirin tlan phalsak theih an ni angn ti.

Inrinni khan Armed Veng Pastor Bial KṬP-ten Aizawl Civil Hospital tan thisen unit 56 an pe a, petute mipa 50 leh hmeichhia paruk an ni. Zemabawk Branch KṬP ten Synod Hospital tan thisen unit 46 an pe a, petute mipa 39 leh hmeichhia pasarih an ni. Champhai Zotlang Branch KṬP-te'n an din champha pualin Champhai District Hospital tan unit 32 pein, petute mipa 28 leh hmeichhia pali an ni a; Melriat Branch KṬP-te'n an diamond jubilee pualin Zoram Medical College-ah unit 34 an pe a, petute mipa 27 leh hmeichhia pasarih an ni. ṬKP Lunglei Theiriat bialte'n Lunglei Civil Hospital tan thisen unit 36 (mipa 26, hmeichhia 10) an pe bawk.