Ni 100 inhlawhnaa ba pek tur Nuai 7,700 vel mamawh a ni - RD Minister
Rural Development (RD) minister Lalruatkima chuan November 6, Zirtawpni khan sorkar laipuia a department chana hotu hrang hrangte Delhi-ah a kawm. Union RD secretary Amarjeet Sinha hnenah MGNREGS (ni 100 inhlawhna) ah ba pek tur cheng nuai 7700 vel la mamawh a nih thu a thlen.
Lalruatkima chuan Amarjeet Sinha hnenah hian MGNREGS hnuaia mipui inhlawhna atana cheng nuai 5,300 sanction a nih avanga lawm thu sawiin, "Mipui pawisa bat mek hi pawisa sanction hian a daih lo a, cheng nuai 7,700 vel mamawh a ni," a ti. Union RD Secretary chuan Krismas hmaa inhlawhna la batte sanction a tum thu a lo hrilh.
Tun dinhmunah Mizoramah ni 72 inhlawhna siam a nih tawh thu sawiin RD Minister chuan, "Kumin atana inhlawhna phal zat ni 88 chu mipui tan a tlem," a ti. Lalruatkima thusawi chungchangah hian Union RD Secretary chuan Mizoramah ni za inhlawhna siam a nih ngei theihna atan December 11, 2019 ah Mizoram sorkar hotute sawipui an tum thu a sawi.
RD minister Lalruatkima chuan SPMRM scheme Mizorama RD block 4-a kalpui mek chungchang Amarjeet hi sawipui nghalin, March 31, 2020 a scheme tihtawp a nih chuan pawisa tamtak hman hman loh a awm dawn thu hrilhin, pawh sei sak tur in a ngen. Union RD Secretary chuan bawhzui a tum thu leh, central sorkar pawhin an pawhsei a rin thu a hrilh.
Lalruatkima hian Department of Land Resources secretary Ruolkhumlien Buhril pawm kawmin, PMKSY (WDC) scheme chungchang a sawi pui a ni. Ruolkhumlien Buhril chuan PMKSY (WDC) scheme zinga project ṭhenkhat state sorkar khawih tawh tura an tihte chu central chuan chhunzawm a tum tawh loh thu leh scheme thar - leilung a tuihna hrang hrang awmte humhalhna tur duan an tum thu a sawi a, "Scheme thar hi ‘Springshed Development’ lam hawi a ni dawn a, sorkar kum kal mek chhungin central sorkar chuan thu thar an neih a beisei awm," a ti.
Ruolkhumlien Buhril chuan PMKSY (WDC) hnuaia batch-III kalpui mekte tana pawisa la sanction loh cheng nuai 3300 aṭangin cheng nuai 1500 sanction thuai an tum thu Lalruatkima hi a hrilh. Lalruatkima hian DoNER Seretary pawh kawmin, Mizoram chhung a DoNER in project hrang hrang a neihte an sawi dun. Project la zawh lohte chu RD Minister hian Chief Minister leh Chief Secretary sawipui a tum thu DoNER Secretary hi a hrilh.