IIT-Madras leh NIT-a zirlai leh zirtirtute'n an hmalakna turah RDA Minister an kâwm

National Institute of Technology (NIT), Mizoram leh Indian Institute of Technology (IIT), Madras-a thawk zirtirtu leh zirlaite chuan nimin khan Rural Development & Administration (RDA) minister Prof. Lalnilawma chu a pisaah an kâwm.

IIT-Madras leh NIT-Mizoram ṭang dun hian Mahatma Gandhi pian champha vawi 150-na hriatrengna atan leh prime minister Narendra Modi-a'n a ngaih pawimawh New India Mission zûlzuiin New India Internship (pilot) an duang a; heng zirna-in pahniha zirlaite hian Mizoramah December 16, 2025 aṭanga January 10, 2026 thlengin New India Internship an kalpui dawn a ni.

Internship programme-in a tum ber chu - Mizorama thingtlang khuate harsatna leh mamawh hrang hrang hriat chhuah a, tunlai thiamna hmanga harsatnate sutkian a ni. Intern-te leh zirna-in pahniha zirlaite'n field research-te neiin, technology hmanga harsatna sutkian dan tur kawng an zir ang.

Internship team-ah hian IIT-Madras aṭangin zirlai 11 leh faculty member pathum an tel dawn a, NIT-Mizoram aṭangin faculty member pathum leh zirlai 21 an tel dawn a ni.

Prof. Lalnilawma chuan, NIT-Mizoram leh IIT-Madras ten remhre taka thawhho an tum chu a lawm thu a sawi a, "Ram pum huap pawha zirna-in ṭha leh chhuanawmte'n Zoram thingtlang khuate hmasawnna tur tunlai thiamna thar ber ber hmanga an zir chian tur hian rah ṭha a chhuah ngei ka beisei," a ti.

RDA Minister hi RDA additional secretary V Laleng-mawia, director K Lalrohlua, joint secretary Lalṭanpuia Hnamte leh MzSRLM chief executive officer Zosangzuali Pachuau ten an ṭawiawm a ni.