Girls Hostel sakna tur fund Serchhip college-in pe ve lo

Assembly Session hnuhnung bera tlangzarh tâk, Report of the Comptroller and Auditor General of India on Social, General, Econo­mics and Revenue Sectors-a tarlan danin, Government Serchhip College hmeichhe hostel sakna tur cheng nuai 55.73 aṭanga college tum ve tur cheng nuai 19.73 chu pek chhuah a ni lo a, Univensity Grants Commission (UGC) in cheng nuai 40 a tum tur a ṭanga cheng nuai 36 chu February 2009 - August 2011 chhungin a pe chhuak.

Hmeichhe hostel sakna tur hian February 27, 2009 khan UGC approval hmuh niin cheng nuai 55.73 senga February 26, 2010 a sak zawh tura tih a ni. July 2012-ah Serchhip college chuan UGC hnenah cheng nuai 55.73 sengin hostel 90% chu April 2012-ah sak zawh a nih thu leh sum awm loh vangin 10% chu sak chhunzawm a nih loh thu  progress report a thawn. 

December 16, 2017 a hostel thlalak aṭanga a lan dan chuan college hi sak zawh a ni lo. December 2017 a hostel sakna sum audit a nih chuan hmeichhe hostel sakna tur atana college tum ve tur cheng nuai 19.73 pekchhuahna record hmuh a ni lo a, UGC in February 2009 - August 2011-a a sanction cheng nuai 36 chauh hmanga sak a nih thu leh July 2012 a college in UGC hnena 'Completion Certificate' a pek chu a rintlak loh tih CAG report chuan a tarlang. 

Audit report chuan college in a sum thawh tur a siam loh vangin sak zawh theih a ni lo, a ti. November 2018 khan Serchhip College Principal chuan hostel sak nana college sum thawh tur chungchang HTE Director hnenah engmah an thlen loh thu a sawia, Mizoram sorkar chuan college hostel sak chungchang leh an sak thlen chin chungchangah hriat an neih loh thu an sawi. 

CAG report chuan state sorkar chu hostel building sak tawh chin a chhiat loh nana luah theih tura sak chhunzawm tur leh hmanraw ṭul leh mamawhte hmeichhia ten zirna sang zawk an chhunzawm theih nan a pek angaih thu a tarlang.