Thlai leia DAMC hmalakna tur sawiho

Lunglei District Agricultural Marketing Committee (DAMC) chu nimin khan Lunglei additional DC Zoramdini kaihhruaiin DC conference hall-ah an ṭhukhawm a; Bana Kaih (Handholding) Scheme Phase-II kaltlanga Lunglei district-a thlai lei lehna tura DAMC hmalakna turte an sawiho.

Mizoram Agricultural Marketing Board (MAMB) ruahmanna zûlzuia Lunglei district-a thlai lei leh hralh kalpui dan tur bakah, hlawhtling leh felfai taka kalpui a nih theih nana hma lak dan turte sawiho a ni. January 13, 2026-ah Lunglei district chhunga secondary collection centre (SCC) hrang hranga mawhphurtu - supervisor, chairman, secretary leh treasurer-te tan Lungleiah Bana Kaih Phase-II kalpui dan tur leh hriat tur pawimawh hrang hrang zirhona (training) buatsaih ni se, tih a ni.

MAMB-in December 5, 2025-a office order a tihchhuaha kum 2026 chhunga Mizoram sorkarin MAMB kaltlanga sawhthing leh hmunphiah ro a leisak (support price a pek) dan tur ruahmanna tarlan a nih danin, SCC kaltlanga sawhthing support price pek theih hun chhung (SCC-a sawhthing lak theih hun chhung) chu February 2 aṭanga May 30, 2026 inkar a ni dawn.

Sawhthing support price hi primary society member-te thar chhuah chauh pek tur niin, buffer stock point siam tawh loin, SCC aṭangin sawhthing hi hralh chhuah vek tur a ni. Primary society member-te sawhthing thar chhuah chu primary collection centre (PCC)-a chhinchhiah fel a nih hnuah chauh SCC-ah kalpui tur niin, PCC hriatpuina lehkha nei lote chu SCC-ah sawhthing an hralh phal a ni dawn lo.

Sawhthing support price dawn beisei lo (claim tum lo)-te chuan an duh dan ang leh ṭha an tih angin engtiklai pawhin an hralh thei thung ang.