KMMTTP leh rêl kawngin a nghawng theihte sawiho

Siaha District Administration leh Siaha College Internal Quality Assurance Cell buatsaihin nimin khan Siaha College-ah Kaladan Multi-Modal Transit Transport Project (KMMTTP) leh Bairabi-Sairang rêl tlanin Mizo hnam, khawtlang leh eibara nghawng a neih theih dan zirho a ni.

Zirhonaah hian Siaha district-a sorkar official leh tlawmngai pawl hrang hrang aiawhte an tel a; Mara Autonomous District Council-a deputy chief executive member S Lalremthanga'n a hmanpui.

S Lalremthanga chuan, hmasawnnain a ṭha leh ṭha lo zawngin nghawng a nei fo tih sawiin, "A ṭha lam chauh ni loin, a ṭha lo laiah engtia lo inven tur nge tih hriat a ṭul. KMMTTP hian Lai leh Mara district-ah nghawng a nei lian ber dawn a, lo inbuatsaih thiam a ṭul hle. Khawtlang nun, sakhuana leh hnam ziarâng tichhe thei lak a fihlim turin mi tinin mawhphurna kan nei a ni," a ti.

Siaha additional SC Abraham Beirazi Khithie pawhin thu sawiin, "KMMTTP kawngpui leh Bairabi-Sairang railway line-in Mizoramah nghawng a nei nasa dawn a, Siahaah pawh nghawng a nei nasa dawn. Sumdawnna lian tak kalpui a nih dawn avangin lo inbuatsaih a ṭul a, mipuite'n a hlâwkna têl turin rilru lo siam lâwk a ṭul," a ti a; MADC leh tlawmngai pawlte'n an ngaihven a ṭul thu a sawi a ni.