Lirthei intlân chhâwkna tur chin tichhuak

Aizawl Traffic SP chuan hriattirna chhuahin, Aizawla lirthei intlân chhâwkin a huam chin tur leh a huam loh turte a tarlang a; hei hi thu dang a awm hma chu hman zui tur a ni.

Lirthei intlân chhâwkin a huam tur kawngpui chu - Bawngkawn leh Kulikawn inkar tlangdung kawngpui (main road) - Bawngkawn Zosangliana Point aṭanga Kulikawn (Ngaizel, Tlangnuam leh Pika Road pêng) thleng a ni a; Chaltlang leh Ramhlun lam kawngpui a huam ve ve.

Sikulpuikawn aṭangin Khatla kawn lamah, Assam Rifles 23 Sector Headquarters gate bul thleng bakah, Khatla kâwn aṭanga Tennis Court, Salvation Army Temple, Tuikual, Vaivakawn taxi stand thlengin a ni bawk.

Lirthei intlân chhâwkna tura tih chin ni lo kawngpui dang zawngah chuan lirthei zawng zawng tlan theih a ni a; hei hian entry period nei lirtheite erawh a huam lo. Intlan chhâwk hun hi nipuiah zing dar 9:30 aṭanga tlai dar 6 thleng leh, thlasikah zing dar 9:30 aṭanga tlai dar 5 thleng a ni a; Inrinni, Pathianni leh sorkar chawlh (holiday) erawh a tel lo thung.

INTLAN CHHAWKIN A HUAM LOHTE

* Governor, Chief Minister, Deputy CM, Assembly Speaker, Minister/MoS, Deputy Speaker, MLA leh AMC corporator te.

* Gauhati High Court judge te.

* Home department (Police, Fire & Emergency Services, MRHGCD, Prisons, Forecsic) duty.

* Excise & Narcotics duty.

* Medical & Hospital emergency duty.

* PHE/PWD/PE depatrment emergency duty.

* Disaster Management hnuaia emergency duty.

* PHE tui semte.

* Ambulance/morgue van

* Executive magistrate - law and order duty.

* Print & electronic media.

* National Informatics Centre (NIC)-a thawkte.

* Army leh para military force te.

* Sorkar department/office despatch rider.

* Kohhran hminga lirthei register.

* AMC hnuaia bawlhhlawh paih lirthei.

* Rualbanlo tana special vehicle.

* Bawnghnute sem leh chanchinbu sem.

* Public service vehicle (passenger phur chi lirthei) - city bus/bazar bus, maxicab (state dang register huamin), institution bus, department bus.