MJA-te'n Kolasib dist sorkar hmunhma tlawh

MJA General Hqrs. hruaitute leh Kolasib District MJA-te chuan December 6-7, 2019 khan Kolasib district chhunga sorkar hmalakna hrang hrang UDPA-in Dihmunzawla bawlhhlawh sawngbawlna an buatsaih 'Solid Waste Management Centre (SWMC)' leh Thingdawla School of Nursing leh Horticulture Centre of Excellence-te an tlawh.

Solid Waste Mangement Centre an tlawhnaah hian MJA-te hi Kolasib DUDO Zonuntluangi Pachuau hoin thawktute'n an lo dawngsawng a ni. DUDO chuan SWMC hian motor pali a ken tel thu sawiin, "Hei hi dawn a ni tawh. Land fill hi a thawktuten zo angah an in ngai nangin kan duh thu a la sam chiah lo. Bawlhhlawh ṭawih thei lo lo thliar hrang leh tur hi ruahmanna a la awm lo a, NULM hnuaia Self Help Group te tih tir kan rilruk,"  a ti. 

Zonuntluangi Pachuau chuan SHG-te hian bawlhhlawh hi thliarin a hralh leh theih ang chi - plastic, thir leh thildangte chu hralh lehin a hralh theih loh chu land fill-ah paih a nih tur thu a sawi, "Land fill kan siam hi kum 15 vel daih turah kan ngai," a ti a, land fill hi a khah hunah a chung zawl chu thil danga la hman ṭangkai leh theih tura an ruahman thu a sawi. 

SWMC hi Mizoramah pilot project tura an ruahman niin, kum 2016 aṭang khan thawh ṭan a ni. A project pumpui hi Rs 4,86,21,804 a ni a, a chhungah hian staff quarters bakah bawlhhlawh a ṭawihthei aṭanga leiṭha a siamna tur (vermi compo­sing), bawlhhlawh ṭawih thei lo thliar hranna (waste recource management), bawlhhlawh paihkhawmna tur (sanitary land fill), bawlh­hlawh thli luanluhna tur (leacheate tank), site office leh weight bridge-te awm tur a ni. 

School of Nursing School an tlawhnaah an principal Lalṭanpuii'n MJA-te hi a lo dawngsawng a ni. Lalṭanpuii sawi danin, School of Nursing School hi December 2017 aṭangin class ṭan a ni a, 3rd batch ten class an ṭan leh deuh chiah a ni. Batch tinah naupang 20 zel, mi 60 awm turah tunah hian mi 57 an awm mek a, staff 11 awmin an zinga panga chu tutor an ni. Tutor-te hi School of Nursing, Thingdawl atana lak ni loin, hmun dang ṭanga pawh khawm an ni. 

Lalṭanpuii chuan an sikul chuan result an neih ṭhat thu sawiin, "Exam kan hma­chhawn hmasak berah Mizorama GNM zirna sikul 5 zingah topper kan neih nghal a, exam kan hmachhawn vawihnihna ah 1st year leh 2nd year-ah pawh topper kan nei leh a ni. Hetihlai hian kan parent hospital atana hman Kolasib District Hospital-ah facilities duhthu a sam loh avangin harsatna kan tawk ṭhin a, a chang chuan Aizawl kan pante a ngai ṭhin," a ti.

MJA president Zonunsanga Khiangte chuan School of Nursing, Thingdawlin result ṭha tak an nei chu lawmawm a tih thu sawiin, "In result ṭhatna chhan chu thawktute inpekna leh thawhrimna avang a ni," a ti a, hun lo kal zel turah pawh result ṭha tak an neih a beisei thu a sawi.

Thingdawl a Horticulture in Centre of Excellence an buatsaih an tlawhnaah MJA-te hi ADHO RL Peka leh a thawhpuite'n lo dawng sawngin, Dragon Fruit Nursery, Curcuma Nursery, Rose Nursery-te an tlawhpui a ni. COE, Thingdawl hi December, 2015 khan hawn a ni a, area hi hectare 21.85 a zau niin, tun dinhmunah green house chhungah rose kung 1600, curcuma kung 44176, anthurium 7812 bakah thlai dang, Capsicum, Zikhlum, Tomato, Brocoli te awmin, open field-ah balhla 400, avocado 200, theihai 50, rambutan 50, mangosteen 250, sweet tamarin 500, valencia 50, coffee 300, kuhva 200, dragon fruit 4008 leh kawlthei kung 50a awm. Kumin hian open field leh green house aṭanga sum an lakluh zawng zawng chu Rs 36,52,405 a ni.