Ruihhlo do chungchang sawiho

December 18, Ningani khan Kolasib District Level Narco Coordination Centre (NCORD) Committee chu an chairman Robert C Lalhmangaiha, bawrhsap hoin an ṭhukhawm a, Kolasib SP Lalrinpuia Varte, Police, Excise & Narcotics, Joint VC leh Sub Hqrs YMA aiawhte leh NCORD member dangte an tel a ni.

Robert C Lalhmangaiha chuan NCORD chu ruihhlo dona kawnga beihpui thlakna atana pawimawh tak a nih thu sawiin, sorkarin ruihhlo dona kawnga dan a duante chu ṭha taka kenkawh a nih theih nan Police, Excise leh department dangte leh pawl hrang hrangte chu theihtawp chhuah turin a chah.

Krismas leh kumthar lo thleng turah mipuiten hlim leh muang taka hunpui an hman chu a duhthusam a nih thu sawiin Kolasib Bawrhsap chuan, "Ruihhlo leh buaina tel loa boruak muanawm hnuaia hunpui hman a nih theih nan mahni zawn ṭheuhah ṭan lak a ṭul," a ti.

Kolasib SP ruihhlo khuahkhirh na kawngah Kolasib Police te hmalakna hrang hrang a tarlang a, ruihhlo danchahna kawngah khawtlang leh YMA hruaitute thawhpuina a ngen.

Ṭhutkhawma Kolasib Police report tarlan danin November 17 atanga December 18, 2025 chhung khan ruihhlo (heroin) gram 83.55 manin, NDPS Act hnuaiah case pakhat an ziaklut. Zu (IMFL) bottle 1,320 (750ml) man bawkin, MLP Act hnuaiah case 1 ziah luh a ni.

Excise and Narcotics department pawhin report pein, November 7 aṭanga December 15, 2025 chhung khan zu (rakzu, IMFL, yeast leh beer) chi hrang hrang an mante belhkhawm hlutna (value) chu cheng 17,79,595/- a tling tih an tarlang bawk.