CYMA-in Kawnpui-Durtlang ṭha leh chak zawka siam chhunzawm turin an chah

Central YMA office bearer-te leh CYMA Road Monitoring Committee member-te chuan nimin khan BRTF (Project Pushpak) hotute leh an hnuaia contractor BRN Infrastructures Pvt. Ltd. hotute chu CYMA pisaah an kâwm a; Kawnpui leh Durtlang inkar kawng siam mek chu ṭha zawk leh chak zawka siam chhunzawm turin an chah.

Kawnpui-Durtlang kawng siam mek hi a ṭhat loh avangin kawngpui a paltlang khuaa YMA branch-te chuan an lungawi loh thu CYMA-ah an thlen a; CYMA Road Monitoring Committee chuan bawhzuiin, December 16, 2025 khan kawng siam chu an enfiah a ni.

CYMA Road Monitoring Committee chuan Kawnpui-Durtlang kawng siam chu a ṭha tawk loah an ngai a; contractor-in ṭha zawka hna a thawh dan tur mumal zawka ruahman a nih hma chuan hna thawk chhunzawm tawh rih lo turin an hriattir. Hmalakna bawhzuiin zelin, nimin khan BRTF leh BRN Infrastructures hotute chu koin an sawipui a ni.

Nimina inkawmnaah hian BRTF leh BRN Infrastructures hotute chuan, hna ṭha zawka an thawh dan tur ruahmanna an siamte an sawifiah. Ruahmanna thar chu CYMA hruaitute chuan ṭha an tihpui phawt a, chak taka hna thawk chhunzawm nghal turin an chah. Kawng siam chhunzawm dan leh hmasawn dante January 10, 2026-ah endik leh an tum thu an hrilh bawk.

Inkawmnaah hian CYMA lam hi president R Lalngheta'n a ho a; BRTF lam chu 24 Task Force commander Sanjay Kumar-a'n a ho a, BRN Infrastructures chu project manager Vishnu Jangra hoin an tel a ni.