Minister-in MILLTA inkhawmpui a hmanpui

Mizo Literature and Language Teachers’ Academy (MILLTA) chuan nimin khan Govt. Aizawl College, Sikulpuikawn campus-ah inkhawmpui an hmang a, Art & Culture minister C Lalsawivunga'n hmanpuiin, seminar lehkhabu a tlangzarh.

Art & Culture Minister chuan, Constitution 8th Schedule-ah Mizo ṭawng a tel ve theih nan theihtawp chhuah zel a tul thu sawiin, "National Education Policy (NEP) 2020 chuan mahni pianpui ṭawnga lehkha zir theih a dah pawimawh," a ti a; Mizo ṭawng chu university level-ah nasa taka hman tura ruahman chhoh a nih tur thu a sawi.

Khawvel hmun hrang hranga Zo fate phuar khawm tur leh zawm khawm turin thu leh hla a pawimawh tih sawiin C Lalsawivunga chuan, "Mizo zai leh thawnthu hrang hrangte hi zir chian tham a ni a, hnam dang lakah pawh chhuan tham a ni. Kan hnam ro hlute hi ziaka nasa lehzuala puan chhuah zel ka duh," a ti.

C Lalsawivunga chuan, MILLTA hmalakna fakin, "Mizo thu leh hla leh ṭawngin hma a sawn zel theihna tura theihtawp in chhuah hi a lawmawm tak zet," a ti a; an hmalakna zara university thlenga Mizo subject zir theih a ni te, doctorate degree hial lak theih a ni leh, Mizorama subject pawimawh ber zinga mi a ni thei chu lawmawm a tih thu a sawi.

Inkhawmpuiah hian an member zinga doctorate degree nei thar panga - Dr Enid H Lalrammuani, Dr Lalrotluanga, Dr F Lalzuithanga, Dr Lalzarzovi leh Dr Thang Sian Tluang te hnenah lawmpuina an hlan a; chawhnuah an president Prof. C Vanlalhruaia kaihhruaiin ro an rel.

MILLTA Secretary report-a a lan danin, kum 2025 chhunga MILLTA member thar 17 awm belhte nen member 149 an awm mek a ni.