IIT leh NIT ten HTE Minister an kâwm

National Institute of Technology (NIT), Mizoram leh Indian Institute of Technology (IIT), Madras-a thawk zirtirtu leh zirlaite chuan nimin khan Higher & Technical Education minister Dr Vanlalthlana chu a pisaah an kâwm.

Dr Vanlalthlana chuan, NIT-Mizoram leh IIT-Madras an thawkho tur chu phûrawm a tih thu sawiin, "In zirchianna leh hmalakna ten thinglang lama zirlaite leh zirtirtute bakah, zirna kalphung hrim hrim pawhin hma a sawn phah ngei ka beisei," a ti a, Mizoram hmasawnna atan theihtawp chhuah tur leh rah ṭha thlen ngei turin duhsakna a hlan.

IIT-Madras leh NIT-Mizoram zirtirtute leh zirlaite hian Dr Vanlalthlana hi a department chan pathum - School Education, Higher & Technical Education leh Information & Communication Technology chungchanga an hriat duhte an zawt a; Minister hian a hrilhfiah a ni.

IIT-Madras leh NIT-Mizoram ṭang dun hian Mahatma Gandhi pian champha vawi 150-na hriatrengna atan leh prime minister Narendra Modi-a'n a ngaih pawimawh New India Mission zûlzuiin New India Internship (pilot) an duang a; zirna-in pahniha zirlaite chuan December 16, 2025 aṭanga January 10, 2026 chhungin Mizoramah New India Internship an kalpui dawn.

Internship programme-in a tum ber chu, Mizorama thingtlang khuate harsatna leh mamawh zir chian a ni a; team-ah hian IIT-Madras aṭangin zirlai 11 leh zirtirtu pathum an tel a, NIT-Mizoram aṭangin zirtirtu pathum leh zirlai 21 an tel a ni.