Kuminah ILP nei lo 932 man tawh; Rêl station-ah ILP 18,193 pe tawh

Aizawl district police-te chuan kuminah December 17, 2025 thleng khan Inner Line Permit (ILP) nei lo leh dik lo taka hmanga mi 932 an man tawh a, Sairang rêl chawlhhmun aṭangin temporary ILP 18,193 an pe chhuak tawh.

Aizawl SP Zosangliana leh thuthar thehdarhtute December 18, Ningania an inkawmnaah Aizawl SP chuan, Aizawl district-a police station hrang hrangte'n ILP checking an nei ṭhin tih a sawi a, "Aizawl khawpuí chhung hmun hrang hrang bakah, Sairang train station leh a chhehvelah ILP checking neih ṭhin a ni. Kumin chhungin (December 17 thleng) ILP checking vawi 160 neih a ni tawh a, ILP nei lo leh dik lo taka hmang mi 932 man an ni tawh a, thubuai 77 ziah luh a ni tawh," a ti.

Zosangliana chuan, Sairang train station-a ILP counter aṭangin temporary ILP 18,193 pek chhuah a nih tawh thu sawiin, "ILP pek chhuah tawh zawng zawng aṭanga 60% vel chu tourist ILP a ni a, 40% vel chu hna thawk tur an ni," a ti. Rêl hmanga Sairang station-a rawn lut kutdawh, zu rûi leh mi dang 136 thawn kîr an nih tawh thu a sawi bawk.