Jail aṭanga chhuak tawhte hun hmanpui

Synod Prison Ministry chuan December 20, Inrinni khan Nursery Veng Kohhran Hall-ah Ex-Prison Inmates Follow Up Programme an buatsaih a, Home minister K Sapdanga'n a hmanpui.

Jail-a táng ṭhin, chhuak tawhte puala Pathian thua inpâwlhona inkhawm hi Synod Prison Ministry (SPM) director Rev. Lalhleia'n a kaihruai a; khuallian Home minister K Sapdanga'n thu a sawi a, Synod executive secretary (i/c SPM) Rev. Dr Rosiamliana Tochhawng-in Pathian thuchah a sawi.

K Sapdanga chuan, jail aṭanga chhuak tawhte chu suala tlu lo tur leh thil sual ti lo tura inveng reng tur te, Pathian bèl tlat tur te, chhungkua, khawtlang leh ram tana ṭangkai nih tum turtein a chah.

Pathian faka zaihona hun hman a ni a; chawhnu lamah jail-a tâng ṭhin chhuak tawhte pualin an rilrua awmte leh testimony sawi chhuahna hun hman a ni bawk. He hunah hian jail-a táng ṭhin chhuak tawh mi eng emaw zat an tel a ni.

Ex-Prison Inmates Follow Up Programme hi jail-a táng tawh ṭhinte'n nun kawng dik an zawh zel theihna tura inûm zuina a ni a; kum khatah vawi hnih buatsaih ṭhin a ni.

Mizoram Synod chuan kum 1984 khan jail-a rawngbawlna an kalpui ṭan a, tunah hian Mizorama jail 10-ah SPM sub-committee din vek a ni. SPM hian counsellor 10 ruaiin, Pathianniah hun bik neiin jail-ahte hian tângte an inkhawmpui ṭhin a ni.