KHAWTHLIR

Sorkarin buhhûm a lei leh ṭan

Mizoram sorkar chuan December 18-19, 2025 khan Pangbalkawn OmOm Rice Mill-ah kumina buh tharte an lei. Buhhûm hi kg khat Rs 30 zela lei a ni a, December 18 bik khan Kolasib district-a mi pali hnen aṭangin quintal 164.15 (kg 16,415) lei a ni. Mizoram sorkar chuan kumin April thla khan kum 2024-a Kolasib leh Mamit district-a thar buhhûm ṭhahnem tak a lei tawh a; tuna a lei hi kumin 2025-a tharte a ni. Hmun danga tharte pawh lei turin sorkar a inbuatsaih mek thu sorkar thuchhuah chuan a tarlang.

MUHCS zawmtu awm belh

BN, Hospital, Kulikawn, Aizawl chuan Mizoram Universal Healthcare Scheme (MUHCS) an zawm thar a, December 19, 2025 khan Mizoram State Healthcare Society nen thuthlung an ziak. Inremna ziah chung-changah hian Health minister Lalrinpuii chuan, "BN Hospital, Aizawl nen MoU kan sign fel ta e. Private hospital pali dangin Expression of Interest (EOI) an rawn thehlut bawk a, an rate-te kan check fel hnuah MoU sign leh tur a ni ang," tiin a tarlang.

Thisen pe

December 20, Inrinni khan Ramthar Veng Branch YMA chuan ZMCH tan thisen unit 52 an pe a, petute mipa 42 leh hmeichhia 20 an ni. KṬP, Sihphir Vengthar Bialin Synod Hospital tan unit 22 an pe a, petute mipa 19 leh hmeichhia pathum an ni a; KṬP, Himali Bialin Civil Hospital, Aizawl tan unit 16 pein, petute mipa 15 leh hmeichhia pakhat an ni. Adventist Youth Federation, Champhai South Bial member mipa 26 leh hmeichhia parukte'n Champhai District Hospital tan thisen unit 32 an pe bawk.

Heroin hâl ral

Lunglei District Disposal Committee chuan an chairman J Lalmuankima, Lunglei SP hoin December 19, 2025 khan Lunglei AP Tlanga bawlhhlawh hâlna (incinerator)-ah heroin gram 64.25 an hâl. Ruihhlo an hâl ral hi Rs 1,83,210 hû a ni a, Lunglei District Court-in a chinfel tawh leh tihral tura a tihte a ni.

ZORO-in lawmpui

Zo Reunification Organisation (ZORO) Gen. Hqrs, Aizawl chuan Ultimate Fighting Championship (UFC) Flyweight champion thar Joshua Van Bawi Thawng (Joshua Van) hnenah tun hnai khan lawmpuina leh chawimawina an hlan. ZORO-in an lawmpuina hi Joshua Van puala Indianapolis, USA-a hun hmannaah ZORO consultant Dr Ro Dinga chuan a hlan a ni.

Ṭanpuina hlan

University of Hyderabad Mizo Post-Graduate Students' Union leh Alumni member-te chuan December 19, 2025 khan mi harsate ṭanpuina tura an thawh khawm Rs 94,200 chu Aizawl veng hrang hranga chhungkaw pathum hnenah an hlan. University of Hyderabad-ah hian Mizo zirlai 25 leh assistant professor pakhat an awm mek a, Alumni member 150 chuang an awm bawk.

Keyboard sem

Active Sound leh Roland company chuan December 20, Inrinni khan Aizawl leh a chhehvela home/centre hrang hrangah Krismas thilpek atan Roland keyboard an hlan. Thilpek an hlante chu - TNT, Hermon Childrens' Home, Abundant Life Home (Leitan), Bethani Home (Sihhmui) leh Ferrando Home te a ni.