Governor-in Krismas thuchah a tichhuak; Malsawmna ni turin mipuite duhsakna a hlân

Governor Gen. Dr Vijay Kumar Singh chuan Krismas leh kum thar thuchah a tichhuak a; Krismas leh kumthar hlim leh lâwm taka hmang turin Mizoram mipui duhsakna hlânin, mirethei leh chanhaite tana malsawmna nih tum turin mipui a chah.

Gen. VK Singh chuan, Krismas chu Mizoramah chuan chhungkua anga hun hmanhona a nih thu sawiin, "Zo nun ze mawi tlawmngaihna par chhuahna hun, rinna, inpawlhona leh mi dang tana luan chhuahna thinlung mi tinte'n an put hun a ni. He hunpuiah hian kan thinlung kawngkharte hawng thar leh ila, mirethei leh chanhai, riangvai, damlo leh baihvaite tana malsawmna nih tum ṭheuh ila, muanna, hmangaihna leh remthu thlentirtu nih i tum ṭheuh ang u," a ti.

Mizo ṭhalaite chakna thahrui, theihna leh duhthusamte chu Mizoram hma lam hun hriltu a nih thu sawiin Larsap chuan, "Hunpui lo thleng hian in thiamna leh theihnate tipung se, in khawhawi tizauin hmabak êng tak Mizoramin a neih a, India ram chak zawk siam a nih theih nan rah ṭha chhuah se a va lawmawm dawn êm," a ti a; Krismas chu upate chawimawina, ngaihsakna leh an hmalakna hlu takte hriat nawn lehna hun ni se a duh thu a tarlang.

Governor chuan, Krismas chuan eng emaw vanga inhmu thiam lote inngaihdam tawnna leh mamawhtute chhawmdawl nante hman ni se a duh thu a sawi a, "Kum thar kan chuànkài hunah pawh kan inpumkhatna leh mawhphurhnate hi ṭha takin vawngnung chhunzawm zel ila, khawtlangah inlungrualna leh muanna awm zel se, state hmasawnna leh khua leh tuite tana ṭha ber tur tinzawnin hma i la chhunzawm zel ang u," a ti a; kum 2026 chu mi tin tan hmasawn kum ni se a duh thu a sawi.

India rama boruak thianghlim ber state ni zel tura ṭan la turin Larsap chuan Mizoram mipui a chah a, "Mahni mihringpui mai bakah, kan vela awm thilnung dang leh leilung tana him lote ti loin hunpui lawm ṭheuh ang u," a ti.

Gen. VK Singh chuan, mi dangte tana rawngbawlna hna thawktu, in chhung luma chhungte kianga hunpui hmang ve thei lo - dan leh thupek kengkawhtu te, ram venhim hna thawktu te, doctor, nurse leh ni tin mamawh phuhru tura duty zawng zawngte zahna chibai a bûk a, "In inpekna avangin hunpui hlim takin kan hman theih phah a ni," tiin a tarlang.