Lunglei MLA-te'n ṭanpuina an sem

Lunglei hming pu bialtu MLA pali chuan December 20, Inrinni khan Lungleia home/centre-te leh District Jail an tlawh a, pawisa an thawh khawm Rs 4,00,000 an sem.

Lunglei East bialtu MLA Lalrinpuii, Lunglei North bialtu MLA V Malsawmtluanga, Lunglei West bialtu MLA T Lalhlimpuia leh Lunglei South bialtu MLA Lalramliana Papuia te hian Lunglei TNT hnenah Rs 2,00,000 an pe a, WADA Centre, Bethel Centre, Chhawmdawlna In, Rescue Centre leh District Jail hnenah Rs 40,000 ṭheuh an pe a ni.

Minister Lalrinpuii chuan, a department enkawl Social Welfare, Women & Child Develop-ment hnuaiah home hrang hrang tihchangtlunna leh hmasawnna atan theihtawp an chhuah thu a sawi a, "Lungleia home-te pawh sorkarin an mamawhna zâwnah a ngaihven reng. Home hrang hrangah ṭhalai tam tak ruihhlo vanga enkawl ngaia an awm hi Mizoram tan hlohna nasa tak leh ram hmasawnna tiṭhuanawptu a ni," a ti.

Home-a enkawltu chu an chhuah hunah an thiamthil hmanga eizawng thei turin Bána Kaih hmangin hmalakpui theih an nih thu sawiin Lalrinpuii chuan, "Sorkar leh department an inring reng. A ti tak tak leh tipuitling turte chu theihtawp chhuahpui kan inhuam," a ti a; ngawlveina bâwih ata tâl chhuak a, chhungkua, kohhran leh khawtlang tana innghahna tlak ni tura chhuah tum turin home-a awmte a fuih.

Lunglei MLA pali hian home-te leh District Jail-a hmalak meknate an en nghal a; enkawltute'n an mamawh leh harsatna an lo thlente chu a theih ang anga bawhzui an tum thu an sawi.

Lunglei TNT-ah hian ruihhlo ngai, vohbik leh upa mi 758 enkawl mek an ni a; WADA Centre-ah ruihhlo ngai mi 16, Bethel Centre-ah naupang 60 (mipa 34 leh hmeichhia 26), Chhawmdawlna Inah ruihhlo ngai 85 (mipa 68 leh hmeichhia 17) leh, Rescue Centre-ah ruihhlo ngai mi 56 (mipa 51 leh hmeichhia 5) enkawl mek an ni a; District Jail-ah mi 114 (mipa 98 leh hmeichhia 16) an awm mek bawk.