Lungleiah vaccine dahṭhatna RVS hawng

Health & Family Welfare minister Lalrinpuii chuan December 19, 2025 khan Lunglei Chief Medical Officer office-a hri danna damdawi (vaccine) dahṭhatna tura siam Regional Vaccine Store (RVS) a hawng. RVS hi Lunglei, Siaha, Lawngtlai leh Hnahthial district-tea hman tur vaccine dahṭhatna tura ruahman a ni.

Health Minister chuan, Lungleia RV chu bung thar kaina a nih thu sawiin, "Lunglei chhehvel district hrang hrangte'n Lunglei aṭanga vaccine sem tur an la thei tawh tur hi a lawmawm. Sorkarin hmasawnna rualkhai zawk a awm theih nan decentralisation (thuneihna sem zâi) a kalpui a, chu chu RVS chungchangah a lo lang chhuak a ni," a ti.

Lalrinpuii chuan, Universal Immunisation Programme hnuaiah vaccine 11 - diphtheria, pertusis, tetanus, polio, measles, rubella, TB, hepatitis B, hemophilus influenza type-B, roravirus leh pneumococcal pneumonia vaccine pek a nih thu a sawi a, "Puitling kawṭhalo vaccine pe turin Doctors Without Border nen hmalakho tum a ni," a ti a; vaccine pek tur Lungleia dah khawl theih a ni ve tawh tur chu hmasawnna lawmawm tak a nih thu a sawi.

Health joint director (EPI) Dr Zoramruati Ralte tarlan danin, Lungleia RVS din tur hian June 25, 2024 khan Ministry of Health & Family Welfare aṭangin phalna hmuh a ni.