Sihhmuia lirthei tlan chak vên nana hman tur steel barricade DC-in a pe

Aizawl district bawrh-sap Lalhriatpuia chuan tun hnai khan Sihhmui Village Council leh YMA hruaitute hnenah Sihhmui Bazar bul National Highway 44(A) kawngpuia lirtheia chetsualna thleng ṭhin ven nan thir hmang siam daidanna hûn sawn theih (steel barricade) pali a hlan.

Sihhmui khawtlang hruaitute tarlan danin, Sihhmui kawngpuiah hian lirthei khalh chak lutuk leh fimkhur loh vanga lirtheia chetsualnaah mi paruk an thi tawh a, hliam eng emaw zat an awm tawh. Steel barricade pali hi Sihhmui VC, YMA leh Sairang Police Station OC ten an enkawl dawn a; lirthei tlân chak lutuk laka inven nana dah tura tih a ni a, lirthei tlân pangngai tikhaihlak zawnga dah a ni ang.

Sorkar thuchhuah tarlan danin, Sihhmui khaw chhung kawngpui hi NH a nih avangin Ministry of Road Transport and Highways (MoRTH) thuchhuak angin speedbreaker dah a rem lo a; MoRTH-in NH atana a phal chin rumble strip dah tum niin, PWD (Highways Division)-in hma an la mek. Rumble strip siam a nih hmaa lo hman lailâwk turin steel barricade hi ruahman a ni.