Sairang - Delhi Rajdhani Express chesual tluang taka tlântir zui a ni

Sairang rêl chawlhhmun aṭanga Delhi pan Rajdhani Express rél, train no. 20507 DN chuan December 20, Inrinni zing dar 2:17 khan Assam state-a Hojai district chhungah sai rual a sut avangin a chesual a, mihring thi leh hliam an awm lo. Rêl hi zing dar 8 pelh hretah a tlan chhuak leh thei a ni.

Thu dawn danin, Sairang-Delhi Rajdhani Express hi coach panga a ni a, passenger zingah Mizo eng emaw zat an tel. Sai rual a sut avang hian rêl coach ṭhenkhat chu kawng aṭangin a chhuak a, mahse, let a awm lo. Chetsualna avang hian sai pasarih thi mah se, mihring thi leh hliam an awm lo thung.

Rêl chesual avang hian Jamunamukh-Kampur Section-a rêl tlan dan tura ruahman a khaihlak nual a, ruahmanna dang siam a ni. Rêla chuangte sawi danin, réla chuangte coach ṭhenkhatah hnawh khawm an ni a, zing dar 8 pelh hretah rel a tlan chhuak leh thei a, Guwahati-ah coach dah belh niin, tluang takin a tlan zui a ni.