Minister-te'n kawng hluihlâwn an enfiah

Minister of state Lalnghinglova Hmar chuan December 20, Inrinni khan a bial Aizawl West-II chhunga Sairang kawng hluihlâwn tawh a enfiah a; Land Revenue & Settlement minister B Lalchhanzova, adviser to CM pahnih TBC Lalvenchhunga leh Lalmuanpuia Punte leh, PWD leh LRS department hotute leh Vaivakawn Local Council nen kawng hluihlawn tawh hman ṭangkai dan tur an sawiho.

Lalnghinglova Hmar chuan, airport mai ni loin, rél lo lutin a hma aia nasa lehzualin Sairang kawng a tihlun thu a sawi a, "Sairang kawng hluihlâwn tawh hi leimin leh chhan dang vanga tuna kan kawng neih chhun a pin châng pawha awlsam taka hêlna tur a nih bakah, Vaivakawn traffic jam nasa lutuk ṭhin a tihziaawm theih ka beisei," a ti.

Revenue minister B Lalchhanzova chuan, "Infras-tructure kan din hian a hlawh-tlinna tak tak hmuh nan hun a duh rei ṭhin a, chutiang ni loin tukina kan enfiah erawh hi chu road map fel tak nen kum hnih ral hmaa puitlin hman theih ni se a duhawm," a ti a; LRS department chuan a ṭul angin theihtawpa hma an lakpui tur thu a sawi.

TBC Lalvenchhunga leh Lalmuanpuia Punte te pawhin thu sawiin, anmahni zâwnah ṭangkai theihna an nei a nih chuan phûr taka hma an lakpui tur thu an sawi a ni.

Sawihonaah hian PWD chu a rang lama road alignment siam tur leh Revenue department chu zirchianna nei turin an ti a; sum mamawh turte lo buaipui turin Adviser to CM (Finance) an ruat bawk.