Lok Bhavan-ah Christmas Carol hmang

December 19, 2025 zan khan Lok Bhavan-ah Christmas Carol Service buatsaih a ni a, Governor Gen. Dr Vijay Kumar Singh leh a nupui Bharti Singh te chuan Aizawl West-I Area Masihi Sangati member-te nen hun an hmangho.

Governor chuan, Krismas chu mi tin huapzo leh hmun tina ngaihhlut hlawh a nih thu sawiin, Krismas lo thleng tur chuan Mizoram leh mipuiah remna leh muanna bakah, inunauna thlen se a duh thu a sawi.

Krismas chu thinlung kawngkharte hawnga mi dang tana malsawmna ni tura luan chhuahna hun a nih thu sawiin Larsap chuan, "Sum leh pai mai ni lo, neih thil remchang ang angte hmanga phal taka mi dangte ṭanpuina hun a ni. Khawngaihna leh lainatna lanitirna hun a ni a, Zo nun ze mawi tlawmngaihna a ken tel avangin Krismas leh Mizo khawtlang nun hi a inhmeh hle a ni," a ti.

Christmas Carol Service-ah hian Aizawl West Area Masihi Sangati pastor Rev. Lalhunthara'n Pathian thuchah a sawi a; Aizawl West-I Area Masihi Sangati Choir-te'n Krismas hla eng emaw zat an rem. Krismas thilpek inhlan tawnna hun hman a ni bawk.