CM-in halpuah hâl lo turin a ngen

Chief minister Lalduhoma chuan nimin khan Krismas thuchah tichhuakin, Mizoram leh khawvel hmun hrang hranga cheng Zo fate Krismas chibai a bûk a; hâlpuah leh hâlmawi khapna thupek zâwm a, hâl lo turin mipui a ngen.

CM Lalduhoma chuan, hâlpuah leh a kaihhnawih thilte khap a nih thu tarlangin, "Kan khawpuite hi traffic tâwt hle mahse a reh raih ṭhin a, hei hi India ram pumah kan lârpui mek. Halpuah leh halmawi lamah pawh kan reh raih theih chuan kan hmingṭha lehzual dawn a, kan hriselna atan a ṭha bawk si a, dan leh thupek i zâwm tlâng ang u," a ti.

Chief Minister chuan, khawtlang tibuai thei thil tih lakah mi tin inthiarfihlim tur leh tawhsual an tawh loh nan fimkhur turin mipui a chah a; mipuiin thlamuang taka Krismas an lawm theih nana venhimna hna thawktu - magistrate, Police, Excise, Fire & Emergency leh sorkara thawk dangte leh tlawmngai pawlte chungah a lawm thu a sawi.

Mahni veng leh khuate chei a, sum leh pai tam tak sênga khawtlang timawitute chungah a lawm thu CM chuan a tarlang a, "Krismas pual hian kohhran, pawl leh mimal tam takin mi dangte tan thilpek hlu tak tak in sem chhuak tih ka hria a, in thil tihte khan Krismas a tiropuiin, Isua Krista a chawimawi a ni," a ti.

CM Lalduhoma chuan, Krismas laiin hmangaih kal tate rilruah an thar ṭhin tih sawiin, "Khawhar taka he hun hmachhawn mek mi tam tak in awm tih kan hria a, in tawrhna leh in lunglennate ka hriatthiampui em em che u a, in tan ka ṭawngṭai a ni," a ti. "Kohhran hrang hrangte hlim taka Krismas hmang turin duhsakna ka hlan a, Pathianin Mizoram malsawm rawh se," a ti bawk.